सटाणा : कर संकलनावरच नागरिकांना पालिकेतर्फे अत्यावश्यक सोयी सुविधा पुरविल्या जातात. मात्र जर अपेक्षित प्रमाणात कर वसुली न झाल्याने नागरिकांना मूलभूत सुविधा देताना प्रशासनास कसरत करावी लागते. मात्र अपेक्षित कर वसुलीसाठी आता सटाणा नगरपरिषदेने थकबाकीदारांवर थेट जप्तीची, मालमत्ता पत्रक व सातबारा उताऱ्यावर बोजा चढविण्याची कार्यवाही सुरू केली असल्याची माहिती पालिकेचे मुख्याधिकारी चंद्रशेखर भोसले यांनी दिली. (Nashik Satana Municipal Council tax collection marathi news)

सटाणा शहरातील मालमत्ताधारकांना घरपट्टी, पाणीपट्टीचे मागणीपत्र देण्यात आलेले असून, थकबाकीदारांना वेळोवेळी नोटिसाही बजावण्यात आलेल्या आहेत. तरी देखील काही मालमत्ता धारकांनी त्यांच्याकडे येणे असलेल्या कराचा भरणा अद्याप केलेला नाही. अशा थकबाकीदारांवर आता नगरपरिषदेने थेट जप्तीची व सातबारा उताऱ्यावर बोजा चढविण्याच्या कारवाईचा बडगा उगारला आहे.

पालिका मुख्याधिकारी श्री भोसले म्हणाले, की थकबाकीवसुलीसाठी थकबाकीदारांच्या घरासमोर ढोल ताशा वाजविणे, नळजोडण्या खंडित करणे मालमत्ता जप्ती वॉरंट बजावण्याची कार्यवाही देखील सुरु झाली आहे. परंतु यावर्षी पहिल्यांदाच नगरपरिषदेने थकबाकीदारांच्या थेट सातबारा उतारा व मालमत्ता पत्रकावर बोजा चढविण्याची कारवाई सुरु केली असून, थकबाकीदारांची नाव आणि थकबाकीची रक्कम यांचे बॅनर देखील प्रत्येक प्रभागात लावण्यात येत आहेत. (Latest Marathi News)

शासकीय अनुदान थांबण्याची शक्यता

शहर विकासाच्या विविध योजना राबवण्यासाठी मालमत्ता कर हा नगरपरिषदेच्या उत्पन्नाचा प्रमुख स्रोत तर आहेच तथापी शासनाकडून मिळणाऱ्‍या १५ व्या वित्त आयोगाच्या भरघोस अनुदानासाठी किमान ९० टक्के कर वसुलीची अट असल्याने तसे झाले नाही तर, शासनाकडून मिळणारे अनुदानही रोखले जाणार आहे.

याचा विपरीत परिणाम शहर विकासावर होणार असल्याने नागरिकांनी त्यांच्याकडे येणे असलेला कराचा भरणा तत्काळ करून नगरपरिषदेस सहकार्य करावे व कटू कारवाई टाळावी असे आवाहनही मुख्याधिकारी श्री. भोसले यांनी केले.