हरसूल : खरशेत ग्रामपंचायतीपैकी शेंद्रिपाडा हे आदिवासी लोकवस्तीचे गाव, ‘सकाळ’ने येथील समस्यांना वाचा फोडल्यानंतर दोन वर्षापासून अनेक मंत्री, अधिकारी येथे येऊन गेले मात्र आजतागायत रस्ता काही झालेला नाही. आदिवासी जनतेला त्याच खाचकळग्तून अन चिखलातून वाट तुडवावी लागत आहे. अधिकारी येऊन गेले, मंत्री असेपर्यत तात्पुरते रस्ता करणार असे सांगितले मात्र नंतर तेही विसरून गेल्याने आज जनतेला हाल सासावे लागत आहे. (Shendripada road in bad condition)

सुमारे अडीचशे ते तीनशे लोकवस्ती असलेल्या शेंद्रिपाड्याला माजी मंत्री आदित्य ठाकरे, माजी खासदार हेमंत गोडसे, आमदार हिरामण खोसकर तसेच मुख्यमंत्री एकनाथ शिंदे यांचे स्वीय सहाय्यक मंगेश चिवटे, मंत्री दादा भुसे यांनीही भेट देऊन गावाची पाहणी करत पूल, रस्ता निर्मिती करण्याचे आश्वासन दिले होते, परंतु या शेंद्रीपाडा गावाला अजूनही कुठल्याही प्रकारची गाडी जात नाही.

येथील रुग्णांना आपत्कालीन परिस्थितीत डोली करून किंवा मोठ्या हालअपेष्टेने पायी-पायी चालत मुख्य रस्त्यावरून वाहनाने प्रवास करावा लागतो. पावसाळ्यात जीवनावश्यक वस्तू घेऊन त्या नेण्यासाठी मोठी कसरत करावी लागते. त्यावेळी दौऱ्यासाठी गावापर्यंत व नदीपर्यंत गाड्या जातील, यासाठी कच्चा रस्ता सार्वजनिक बांधकाम विभागाने तत्काळ करून उपलब्ध करून दिला होता. (latest marathi news)

मात्र मंत्री जाताच हा रस्ताही गायब झाला आहे. पक्का रस्ता करण्याची कुठलीही तसदी सार्वजनिक बांधकाम विभागाने किंवा लोकप्रतिनिधींनी घेतली नसल्याने शेंद्रिपाडा गाव अजूनही रस्त्यांपासून वंचितच आहे. लवकरात लवकर रस्त्याची निर्मिती व्हावी व शेंद्रीपाडेकरांची हेळसांड थांबवावी अशी मागणी स्थानिक ग्रामस्थ करत आहेत.

"शेंद्रीपाडा गावाला रस्ता व्हावा यासाठी सार्वजनिक बांधकाम विभागाच्या नाशिक येथील कार्यालयात अनेक वेळा फेऱ्या मारल्या, मात्र अधिकारींकडून फक्त आश्वासन मिळाले, अजून प्रत्यक्षात कुठल्याही निधीची तरतूद या रस्त्यासाठी करण्यात आलेली नाही. या गावाला मुख्यमंत्री ग्रामसडक योजनेतून रस्ता व पूल करावा."- विठ्ठल दळवी, सरपंच, खरशेत.