सिन्नर : येथील मुसळगाव औद्योगिक सहकारी वसाहतीतील त्रंबक प्लॅस्टिक कंपनीला शुक्रवारी (ता.५) दुपारी ४ वाजेच्या सुमारास अचानक आग लागली. बघता-बघता आगीने रौद्ररूप धारण केल्यामुळे आगीचे लोळ व धूर निघू लागले. त्यावेळी कामगारांनी बाहेर जात अग्निशमन दलाला पाचारण केले. जवानांनी अर्धा तास मेहनत घेत आग आटोक्यात आणली. या कंपनीत अॅक्रीलिक शीट तयार होतात. (Nashik Fire accident at Trimbak Plastic Company in musalgaon news)

अचानक या शीटला आग लागल्याने आग सर्व कंपनीत पसरली. कंपनीत आगीची भट्टी असून सुदैवाने मोठी घटना घडली त्यातच काही कळायच्या आत सर्वत्र धुराचे लोट दिसू लागले. कामगारांना आग लागल्याचे कळताच त्यांनी बाहेर पळ काढला. या दरम्यान तत्काळ मुसळगाव एमआयडीसी व माळेगाव एमआयडीसी तसेच सिन्नर येथून सिन्नर नगरपरिषदेचे अग्निशमन दलाला पाचारण केले.

अग्निशमन दलाच्या जवानांनी तत्काळ या आगीवर नियंत्रण मिळवले. सुमारे अर्धा तासानंतर आग आटोक्यात आली. त्यामुळे पुढील अनर्थ टळला. आगीमध्ये कारखान्याचे मोठे आर्थिक नुकसान झाले आहे. यामध्ये कोणत्याही प्रकारची जिवीत हानी झाली नाही. मात्र प्लॅस्टिकने पेट घेतल्यामुळे परिसरात धुराचे लोळ दिसत होते. आगीचे नेमके कारण स्पष्ट झाले नाही. औद्योगिक वसाहतीचे चेअरमन नामकर्ण आवारे तसेच सिन्नर तालुका सहकारी औद्योगिक वसाहतीचे पदाधिकारी व कर्मचारी यांनी घटनास्थळी जाऊन माहिती घेत मदतकार्य केले. (latest marathi news)

सुरक्षेचा प्रश्न ऐरणीवर

मागील काही महिन्यात मुसळगाव औद्योगिक वसाहत येथे एका कंपनीला आग लागली होती. या आगीत कंपनीचे खूपच आर्थिक नुकसान झाले होते. त्यानंतर दुसऱ्यांदा यावेळी मुसळगाव एमआयडीसीत कंपनीला आग लागल्यामुळे पुन्हा सुरक्षेचा प्रश्न आता ऐरणीवर आला आहे.

सिन्नर तालुका सहकारी औद्योगिक वसाहतीतील पदाधिकाऱ्यांनी तसेच मालक, कामगार यांच्या समवेत अग्निरोधक याविषयी एक कार्यशाळा आयोजित केली होती. कार्यशाळेत आगीवर कसे नियंत्रण मिळावे, तसेच कारखान्यात आग लागू नये, यासाठी कारखान्यात काय सुविधा कशा असाव्यात याविषयी कार्यशाळा घेतली होती.