सिडको : नाशिक येथून मुंबईच्या दिशेने बटाटे घेऊन जाणाऱ्या ट्रकला सोमवारी (ता.११) लेखा नगर भागात उड्डाणपुलावर आग लागल्याने ट्रकमधील बटाटे खाक झाले. सुदैवाने कोणतीही जीवित हानी झाली नसून ट्रकचालक व क्लीनर सुखरूप आहेत. (Nashik fire truckload of potatoes on flyover Lekha Nagar marathi news)

घटनेची माहिती मिळताच अग्निशमन विभागाने घटनास्थळी दाखल होत अर्ध्या तासात आगीवर नियंत्रण मिळवले. उड्डाण पुलावर अचानक ट्रकला आग लागल्यामुळे दोन्हीही बाजूंच्या वाहतुकीची पूर्णतः कोंडी झाली होती. अंबड पोलिस ठाण्याचे पथक, अग्निशमन विभाग यांनी काही वेळात ट्रक बाजूला करून वाहतूक सुरळीत केली.

मुंबईच्या दिशेने उड्डाण पुलावरून जाणारा ट्रक क्रमांक (युपी७५ एटी ९३९३) जाताना सायंकाळी ७:३० वाजेच्या सुमारास लेखानगर भागात अचानक ट्रकच्या पाठीमागील टायरला आग लागली आणि काही वेळातच ट्रकची मागील बाजू पूर्णतः जळू लागली. ट्रकला लागलेली आग इतकी भीषण होती की, आजूबाजूला तब्बल पाचशे ते सहाशे मीटर लांबच लांब वाहनांच्या रांगा लागल्या होत्या. (Latest Marathi News)

यामुळे उड्डाण पुलावर काही वेळासाठी वाहतुकीची कोंडी झाली. अंबड पोलिस ठाण्याचे पथक तसेच अग्निशमन बंब घटनास्थळी दाखल झाले. आग विझविण्यासाठी शर्थीचे प्रयत्न केले. अर्ध्या तासात आग विझविण्यात अग्निशमन विभागाच्या जवानांना यश आले. ट्रकमधील बटाटा व इतर साहित्याचे नुकसान झाले. आग बघण्यासाठी लेखानगर तसेच कमोदनगर परिसरातील सर्विस रोडवरही वाहनचालकांनी मोठी गर्दी केली होती. ट्रकला आग कशामुळे लागली याबाबत माहिती मिळू शकली नाही.

लँडलाइन नंबर बंदच?

आगीचे कारण शोधण्यासाठी नागरिकांनी सिडको अग्निशमन दल व अंबड पोलिस ठाणे येथील लँडलाइनवर क्रमांकांवर संपर्क साधण्याचा प्रयत्न केला असता दोन्हीही लँडलाइन नंबर लागत नसल्याच्या तक्रारी मोठ्या प्रमाणात प्राप्त झाल्या आहेत. या तक्रारी नेहमीच्या असून संबंधित लँडलाइन फोन का लागत नाही. याबाबतचे उत्तर मात्र अद्यापपर्यंत मिळू शकलेले नाही. अशीच आपाबिती भविष्यात होऊ लागली आणि आपत्कालीन परिस्थिती उद्भवली तर हे नंबर लागत नसल्यास त्याला जबाबदार कोण, याबाबतचा प्रश्न नागरिक विचारत होते.