Nashik News : लोकसभा निवडणुकीपाठोपाठ झालेल्या नाशिक शिक्षक मतदारसंघाच्या निवडणुकीची आचारसंहिता शुक्रवारी (ता.५) संपुष्टात आली. आचारसंहितेमुळे गत साडेतीन महिन्यांपासून आचारसंहिता असल्याकारणाने सर्व शासकीय कामांना ब्रेक लागला होता. मात्र, ही आचारसंहिता उठल्याने आता रखडलेल्या जिल्हा प्रशासन, जिल्हा परिषदेतील कामांना वेग येणार आहे. (Nashik Teacher Constituency)

लोकसभा निवडणुकीची आचारसंहिता १६ मार्च रोजी लागू करण्यात आली होती. ती आचारसंहिता संपत नाही तोच विधानपरिषदेची निवडणूक जाहीर झाली. त्यामुळे याही निवडणुकीची आचारसंहिता संपणार आहे. आचारसंहितेमुळे अनेक कामे राहून गेली होती. अनेक कामांची निविदा काढण्यात अडचणी येत होत्या.

त्यामुळे आता हे सर्व काम मार्गी लागण्यास मदत होणार आहे. आचारसंहितेमुळे विकासकामांना खीळ बसली होती. लोकसभा निवडणुकीची आचारसंहिता लागू होण्यापूर्वी महापालिकेने चालू आर्थिक वर्षाचे अडीच हजार कोटींचे वेळापत्रक मंजूर केले. त्यानंतर १६ मार्चला लोकसभा निवडणुकीची आचारसंहिता लागू झाली होती.

त्यामुळे जवळपास अडीच महिने म्हणजे ५ जूनपर्यंत आचारसंहिता लागू होती. त्यामुळे अंदाजपत्रकात तरतूद केलेल्या एकाही विभागाच्या कामाला प्रारंभ होऊ शकला नव्हता. लोकसभेची आचारसंहिता संपत नाही तोच राज्य निवडणूक आयोगाकडून शिक्षक मतदारसंघाची आचारसंहिता पुढे लागू करण्यात आली. (latest marathi news)

त्यामुळे पुन्हा एकदा महिनाभर विकासकामे रेंगाळली. जिल्हा परिषदेची कामे रखडली होती. मात्र, आता या कामांचा मार्ग मोकळा झाला आहे. जिल्हा परिषदेमध्ये सेसमधील किमान २० हून अधिक योजनांच्या निविदा आचारसंहितेच्या कालावधीत निघू शकल्या नव्हत्या.

त्याशिवाय जिल्ह्यातील विविध रस्त्यांच्या कामाच्या निविदा तसेच जिल्हा परिषदेच्या नवीन इमारतीच्या इलेक्ट्रीफिकेशन कामाची निविदा तसेच सिव्हील हॉस्पिटलच्या माता बालक रुग्णालयाच्या डीपीची प्रशासकिय मान्यता अशा सर्व कामांचा मार्ग मोकळा होणार आहे.