Nashik Teacher Hunger Strike : राज्य शासनाच्या आदिवासी विकास विभागांतर्गत एकात्मिक आदिवासी विकास प्रकल्प शाळेत पूर्वीप्रमाणे कला- क्रीडा, संगणक शिक्षक यांना पुनर्नियुक्ती शासनाने द्यावी, या मागणीकरिता कंत्राटी कला-क्रीडा संगणक कृती समितीतर्फे अन्नत्याग आंदोलन सुरू होते. या आंदोलनास ग्रामविकासमंत्री गिरीश महाजन यांनी भेट देत चर्चा केली असता त्यांनी अन्नत्याग आंदोलन मागे घेऊन साखळी उपोषण करावे, अशी विनंती केली. (hunger strike of teachers for reappointment )

त्यावर आंदोलनकर्त्यांनी अन्नत्याग आंदोलन मागे घेत शनिवार (ता. १७)पासून साखळी उपोषण सुरू केले. आदिवासी विकास विभागांतर्गत एकात्मिक आदिवासी विकास प्रकल्प शाळेत एक हजार ५०० कंत्राटी शिक्षक गत तीन-चार शैक्षणिक वर्षांपासून राज्यभरात कार्यरत होते. परंतु, सन २०२३-२४ या शैक्षणिक वर्षात त्यांना कामावरून कमी करण्यात आले. तेव्हा पूर्वीप्रमाणे कला-क्रीडा संगणक शिक्षक यांना पुनर्नियुक्ती शासनाने द्यावी, अशी त्यांची मागणी आहे. (Latest marathi news)

या मागणीसाठी कंत्राटी कला-क्रीडा, संगणक शिक्षक कृती समितीतर्फे १२ ऑगस्टपासून हुतात्मा अनंत कान्हेरे मैदानाबाहेर अन्नत्याग आंदोलन सुरू केले आहे. आंदोलनाच्या पाचव्या दिवशी शुक्रवारी (ता. १६) आंदोलनकर्त्यांतील काहींची तब्येत खालावली. त्या वेळी जिल्हा रुग्णालयातील डॉक्टरांना पाचारण करण्यात आले होते. त्याचवेळी जिल्हा दौऱ्यावर असलेले ग्रामविकासमंत्री महाजन यांनी आंदोलनकर्त्यांची भेट घेऊन चर्चा केली.

त्या वेळी महाजन यांनी मागण्यांबाबत सरकार सकारात्मक असून, लवकर निर्णय घेईल. आंदोलन मागे घ्यावे, अशी विनंती केली. मात्र, नियुक्तीशिवाय माघार नाही, अशी भूमिका आंदोलनकर्त्यांनी या वेळी घेतली. महाजन यांनी अन्नत्याग आंदोलन न करता साखळी उपोषण करावे, मागण्यांबाबत मंत्रिमंडळाच्या बैठकीत निर्णय घेण्याचे आश्वासन त्यांनी या वेळी दिले. त्यामुळे आंदोलनकर्त्यांनी शनिवारपासून साखळी उपोषण सुरू केल्याचे आकाश निकम, शैलेंद्र वळवी, दशरथ मेंगाळ, योगेश राघू, विनोद घुले यांनी सांगितले.