Nashik News : शहराला लागून असलेल्या चारही बाजूचे रस्ते प्रशस्त झाले आहेत. रस्त्यांचे रुंदीकरण झाल्याने दळणवळण सोयीचे झाले आहे. मालेगाव- नामपूर रस्ता रुंदीकरणानंतर प्रशस्त झाला असून वर्दळ वाढली आहे. त्याचबरोबर या रस्त्यावर सातत्याने होणारे अपघात चिंतेचा विषय ठरत आहे. मालेगाव ते वडनेर पर्यंतचा रस्ता अपघाताचा केंद्र बिंदू ठरु पाहत आहे. मालेगाव- नामपूर रस्तावरील कॅम्प भागातील दुध डेअरीपासून ते अजंगपर्यंत रस्त्यात केवळ दोन ठिकाणी गतिरोधक आहेत. (Malegaon Nampur road became center of accident )

रुंदीकरणानंतर रस्ता गुळगुळीत झाला आहे. दुचाकी व चारचाकी चालक आपली वेगाने वाहने हाकतात. दर दोन-चार दिवसांनी अपघात होत आहेत. त्यामुळे अपघातांचे प्रमाण वाढू लागले आहे. यातच दुचाकी अपघातांचे प्रमाण सर्वाधिक आहे. यामुळे वाहनांच्या वेग नियंत्रणासाठी उपाययोजना करण्याची मागणी जोर धरु लागली आहे.

वाहतूक नियमांचा विसर

मालेगाव- नामपूर रस्त्यावर चार ठिकाणी पेट्रोलपंप आहेत. रस्त्यावरून पंपावर पेट्रोल भरण्यासाठी जाणारी वाहने ही रस्त्याच्या दोन्ही बाजूकडील वाहने न पाहता आणि वळण्यासाठी इंडिकेटर देत नसल्याने वाहनांचे अपघात होवू लागले आहे. रस्त्यावरून वळण घ्यायचे राहिल्यास येथे हात देण्याची प्रथा रुढ आहे. यामुळे देखील अपघातांची संख्या वाढली आहे. रस्त्यावरील पेट्रोलपंप तसेच मोक्याच्या ठिकाणी गतिरोधक बसविणे गरजेचे आहे.

मोबाईल चोरट्यांचा सुळसुळाट

मालेगाव-अजंग रस्त्यावर मोबाईल चोरट्यांचा सुळसुळाट आहे. दुचाकीचालक साधारणत: शर्टच्या खिशात मोबाईल ठेवून वाहने चालवितात. चोरटे दुचाकीवर पाठीमागून येत दुचाकीस्वाराच्या खिशातून मोबाईल काढून पोबारा करतात. या गोंधळात अनेक दुचाकींचे अपघात होवू लागले आहेत. चोरट्यांचा तपास लागत नसल्याने बहुतेक जण तर चोरीच्या तक्रारही देत नाहीत. भोसले पेट्रोलपंप ते अजंग भवानी टेकडी दरम्यानच्या रस्त्यावर सायंकाळी सात ते अकरा या वेळेत मोबाईल चोरट्यांचा सुळसुळाट दिसून आहे.