Nashik Police : शहर पोलिस आयुक्तालयाच्या हद्दीमध्ये गेल्या काही दिवसांमध्ये गुन्हेगारी घटना वाढल्याने टीका होते आहे. आयुक्तांनी घेतलेल्या आढाव्यात वरिष्ठ पोलिस निरीक्षकांकडून समाधानकारक खुलासा न केल्याने अखेर आयुक्तांनी कानउघाडणी करताना थेट कारवाई करण्याचा सज्जड इशारा देताना ‘लेखी’ आदेशच बजावले आहेत. शहर पोलिस आयुक्त संदीप कर्णिक यांच्या उपस्थितीमध्ये आयुक्तालयामध्ये नुकतीच बैठक झाली. (Commissioner sandeep karnik written orders have been issued while giving warning )

या बैठकीला आयुक्तालयातील पोलिस ठाण्याच्या वरिष्ठ पोलिस निरीक्षकांसह विविध पथकांचे प्रमुख अधिकारी उपस्थित होते. बैठकीत पोलिस ठाणेनिहाय गुन्ह्यांचा आढावा घेण्यात आला असता, पोलिस ठाण्यांच्या हद्दीत वाढलेले गुन्हे, रखडलेले तपास, अकस्मात मृत्यूंचे प्रलंबित तपास, तक्रारी, प्रलंबित मुद्देमाल यासंदर्भात अनेकांना समाधानकारक खुलासा करता आला नाही. यावरून बैठकीत आयुक्तांनी साऱ्याच अधिकाऱ्यांची कानउघाडणी करतान गुन्हेगारीसंदर्भात प्रतिबंधात्मक उपाययोजना कठोरपणे राबविण्याचे आदेश दिले. (latest marathi news)

खुलासा करण्यासंदर्भात वारंवार पाठपुरावा करूनही आयुक्तालयाकडे गुन्ह्याची माहिती मिळत नसल्यानेही आयुक्तांनी यावेळी नाराजी व्यक्त केली. यामुळे संबंधित निरीक्षकांना लेखी स्वरुपात ताकीद देण्यात आली. प्रलंबित कामे व तपास पूर्ण करण्यासह गुन्हे नियंत्रणाकरीता ठोस कारवाई करुन उपाययोजनांचा आढावा घेण्याच्या सूचनाही यावेळी करण्यात आल्या.

खांदेपालटाची शक्यता

आयुक्तालय हद्दीतील वाढत्या गुन्हेगारी घटनांनी शहर पोलिसांवर टीकेची झोड उठली आहे. टवाळखोरी, हाणामाऱ्या, रात्री उशिरापर्यंत सुरू असणारे हॉटेल्स यासंदर्भात अनेक तक्रारी आयुक्तालयाकडे येत आहेत. तर काही तक्रारी या थेट शहरातील काही पोलिस ठाण्याच्या ‘प्रभारी’ च्याही प्राप्त झाल्याचे समजते. त्यासंदर्भात आयुक्त गंभीर असून, येत्या काही दिवसात काही पोलिस ठाण्यांच्या प्रमुखांची उचलबांगडी होण्याची शक्यता व्यक्त केली जात आहे.