Engineering Diploma Admission : दहावीनंतर अभियांत्रिकी व तंत्रशिक्षण शाखेतील पदविका (डिप्‍लोमा) अभ्यासक्रमास प्रवेशाची प्रक्रिया सध्या सुरू आहे. या अंतर्गत नोंदणीची मुदत मंगळवार (ता. २५)पर्यंत दिली आहे. पुढील प्रवेश फेऱ्यांचे वेळापत्रक अद्याप जाहीर केलेले नसून, नोंदणीला मुदतवाढ मिळण्याची शक्‍यता आहे. शैक्षणिक वर्ष २०२४-२५ करिता ही प्रवेशप्रक्रिया राबविली जात आहे. (Possibility of extension of time for diploma admission registration)

तंत्रशिक्षण संचालनालयातर्फे पार पडत असलेल्‍या या प्रक्रियेत सहभागी होण्यासाठी नोंदणी करणे आवश्‍यक आहे. त्‍यासाठीची गेल्‍या २९ मेस नोंदणीची प्रक्रिया सुरू झाली होती. सध्या जाहीर झालेल्‍या वेळापत्रकानुसार मंगळवार (ता. २५)पर्यंत पात्रताधारक विद्यार्थ्यांना नोंदणी करता येईल. लॉगइनद्वारे नोंदणी करून विद्यार्थ्यांना कागदपत्रे अपलोड करायची आहेत. त्‍यासाठी ई-स्‍क्रुटीनी किंवा प्रत्‍यक्ष स्‍क्रुटीनी असे दोन पर्याय उपलब्‍ध करून देण्यात आले. विद्यार्थ्यांना त्‍यांच्‍या सोयीच्‍या पर्यायाची निवड करता येणार आहे. (latest marathi news)

जुलैमध्ये पहिल प्रवेशफेरी

सध्याच्‍या वेळापत्रकानुसार नोंदणीची मुदत संपल्‍यावर गुरुवारी (ता. २७) तात्‍पुरती गुणवत्ता यादी प्रसिद्ध केली जाणार आहे. यासंदर्भातील तक्रार, हरकत नोंदविण्याची मुदत २८ ते ३० जूनदरम्‍यान असेल. २ जुलैला अंतिम गुणवत्ता यादी प्रसिद्ध केली जाईल. त्‍यानंतर कॅप राउंडची प्रक्रिया सुरू होईल. नोंदणीला मुदतवाढ दिल्‍यास या वेळापत्रकात बदल होण्याचीही शक्‍यता आहे.