RET Admission : शिक्षणाचा हक्‍क कायद्यांतर्गत २५ टक्‍के जागांवर मोफत प्रवेशासाठी शुक्रवारी (ता. ७) सोडत काढणार असल्‍याचे घोषित केले होते. त्‍यानुसार पालकांना निवडीसंदर्भात आस लागून होती. दरम्‍यान, वेळापत्रकानुसार सोडत काढली खरी; परंतु न्‍यायप्रविष्ट प्रकरणामुळे आकडेवारी व निवड यादी जाहीर करण्यात आली नाही. आता १२ जूनला सुनावणी होणार असून, न्‍यायालयाच्‍या परवानगीनंतर सविस्‍तर तपशील जाहीर केला जाणार असल्‍याचे सूत्रांनी सांगितले. ( Outcome of court hearing now waiting for June 12 marathi )

शैक्षणिक वर्ष २०२४-२५ साठी शिक्षणाचा हक्‍क कायद्यांतर्गत आर्थिक व सामाजिकदृष्ट्या दुर्बल घटकांना खासगी शाळांमध्ये मोफत प्रवेशासाठी प्रक्रिया राबविली जाते आहे. २५ टक्‍के राखीव जागांवर प्रवेशासाठीच्‍या या प्रक्रियेला विद्यार्थी, पालकांचा चांगला प्रतिसाद मिळाला होता. उपलब्‍ध जागांच्‍या तुलनेत तिप्पट अर्ज आल्‍याने सोडतीकडे विद्यार्थी, पालकांचे लक्ष लागून होते. काही दिवसांपूर्वी सूचना जारी करताना सोडत पुणे येथून शुक्रवारी जाहीर करणार येणार असल्‍याचे शिक्षण विभागाने स्‍पष्ट केले होते. (latest marathi news)

त्‍यानुसार सोडत जाहीर करण्यात आली आहे; परंतु कायद्यातील बदलासंदर्भातील प्रकरण न्‍यायप्रविष्ट असून, १२ जूनला यासंदर्भात उच्च न्‍यायालयात सुनावणी होईल. त्‍यामुळे शिक्षण विभागाने सोडतीसंदर्भातील कुठलीही माहिती प्रसिद्ध केलेली नाही. निवड झालेल्‍या विद्यार्थ्यांची संख्या किंवा यादी उपलब्‍ध केलेली नव्‍हती. सुनावणीदरम्‍यान न्‍यायालयाच्‍या परवानगीनंतर हा तपशील जाहीर केला जाणार असल्‍याची शिक्षण विभागाची भूमिका असल्‍याचे सांगण्यात आले आहे.

...तर सोडतीची तारीख जाहीर केलीच का?

पालकांनी सोडत जाहीर होणार म्‍हणून दुपारपासून संकेतस्‍थळाला भेट देण्यासाठी लगबग सुरू केली होती. मात्र, कुठल्‍याही स्वरूपाचा तपशील उपलब्‍ध होत नसल्‍याने पालकांना मनस्‍तापाला सामोरे जावे लागले. प्रकरण न्‍यायप्रविष्ट होते तर सोडतीची तारीख जाहीर करण्यासाठी घाई का केली गेली, असा प्रश्‍न काही पालकांनी उपस्‍थित केला.