Nashik News : शिक्षणाचा हक्‍क कायद्यांतर्गत खासगी शाळांमध्ये २५ टक्‍के जागांवर मोफत प्रवेशाच्‍या प्रक्रियेला पुन्‍हा एकदा ‘ब्रेक’ लागला आहे. न्‍यायप्रविष्ट प्रकरणामुळे सोडतीचा तपशील उपलब्‍ध करून दिलेला नाही. त्‍यातच संकेतस्‍थळ ‘देखभाल दुरुस्‍ती’च्या नावावर ठप्प झाले असल्‍याने पालकांच्‍या पोटात गोळा आल्‍याचे पाहायला मिळत आहे. शाळा सुरू होण्यास अवघे काही दिवस उरलेले असताना प्रवेशप्रक्रियेत होत असलेल्‍या विलंबाबाबत चिंता व्‍यक्‍त केली जात आहे. (RTE admission Process outage)

शिक्षण विभागातर्फे शिक्षणाचा हक्‍क कायद्यांतर्गत खासगी शाळांमध्ये सामाजिक व आर्थिकदृष्ट्या दुर्बल घटकांतील बालकांना शिक्षणाची संधी उपलब्‍ध करून दिलेली आहे. त्‍यानुसार शैक्षणिक वर्ष २०२४-२५ च्‍या प्रवेशाची प्रक्रिया राबविली जाते; परंतु वारंवार अडथळे येत असल्‍याने ही प्रक्रिया पूर्णपणे ठप्प झालेली आहे.

यापूर्वी शिक्षण विभागाने प्रक्रिया हाती घेतली होती. मात्र, तेव्‍हा स्‍थानिक स्‍वराज्‍य संस्‍था, अनुदानित शाळांचा समावेश असल्‍याने प्रवेशासाठी फारसा प्रतिसाद मिळाला नव्‍हता. मात्र, न्‍यायालयाच्‍या हस्‍तक्षेपानंतर ही प्रक्रिया स्‍थगित करीत इंग्रजी माध्यमाच्‍या खासगी शाळांचा योजनेत समावेश करण्यात आला आहे. (latest marathi news)

यानंतर विद्यार्थी, पालकांचा जोरदार प्रतिसाद मिळाला होता. मात्र, प्रकरण न्‍यायप्रविष्ट असताना, प्रवेशासाठीच्‍या सोडतीचा तपशील अद्याप जाहीर करण्यात आलेला नाही. त्‍यातच प्रवेशासंबंधीचे संकेतस्‍थळ ‘साईट इज अंडर मेंटेनन्‍स’ असे दाखविले जात असल्‍याने विद्यार्थी, पालकांची घालमेल वाढली आहे.

साधारणतः येत्‍या आठवड्यात शाळांची घंटा वाजणार असून, लागलीच अध्ययन प्रक्रियेला सुरवात होईल. दुसरीकडे आरटीई अंतर्गत प्रवेशनिश्‍चितीसाठी कागदपत्र पडताळणीसह अन्‍य प्रक्रिया पूर्ण करायची आहे. त्‍यासाठी भरपूर वेळ लागेल. अशात विद्यार्थ्यांचे शैक्षणिक नुकसान होण्याची भीती व्‍यक्‍त केली जात आहे.