Nashik Summer Heat : शहर व परिसरात उन्हाने पुन्हा डोके वर काढल्याने नागरिकांची चिंता वाढली आहे. ढगाळ वातावरण व बेमोसमी पावसामुळे चार दिवस पारा खाली आला होता. दोन दिवसापासून तापमान पुन्हा ४२ अंशावर गेल्याने जिवाची काहिली होणारे ऊन पडत आहे. यामुळे नागरिक दुपारी घराबाहेर पडत नाहीत. अशा परिस्थितीत सोमवारी (ता.२०) लोकसभा निवडणुकीचे मतदान किती टक्के होते याबाबत उत्सुकता आहे. ( temperature starts rising in Malegaon on Sunday temperature reached 42 degrees )

येथे मार्चच्या शेवटच्या आठवड्यापासून तापमान वाढत गेले आहे. जवळपास दीड महिने पारा ४२ ते ४४ अंशादरम्यान राहिला आहे. बेमोसमी पाऊस व ढगाळ वातावरणाने नागरिकांना दिलासा मिळाला होता. १२ व १३ मे या दोन दिवसात पारा ४० अंशाच्या खाली आला होता. १४ मे पासून तापमान पुन्हा ४० अंशावर गेले आहे.

वातावरणात होणाऱ्या बदलामुळे १६ मेस पारा पुन्हा ३९.२ अंशापर्यंत खाली आला होता. दोन दिवसापासून कडक ऊन पडत आहे. तापमान ४१ अंशावर गेल्याने सकाळी दहापासूनच उन्हाच्या झळा बसत आहेत. कडक उन्हामुळे दुपारी बारा ते सायंकाळी पाचपर्यंत दळणवळण मंदावले आहे. (latest marathi news)

मतदानाचा टक्का वाढावा

लोकसभा निवडणूक मतदानाच्या तोंडावरच उन्हाचा तडाखा वाढल्याने उमेदवार व त्यांच्या समर्थकांना धडकी भरली आहे. निवडणूक विभागाने मतदानाची टक्केवारी वाढण्यासाठी महिन्यापासून विविध उपक्रम राबविले. यातून जनजागृती करण्यात आली. असे असले तरी कडक ऊन अडसर ठरण्याची शक्यता आहे. ग्रामीण भागात मतदानाचा टक्का वाढविण्याचे आवाहन सर्वच घटकांपुढे आहे.

मालेगावातील तापमान

तारीख - तापमान

१५ मे - ४०

१६ मे - ३९.२

१७ मे - ४०.२

१८ मे - ४१.२

१९ मे - ४२