नाशिक : शेतजमिनीच्या उतार्यावरील आकाराच्या नोंदी दुरुस्ती करण्यासाठी १० हजारांची लाच स्वीकारणार्या कसबे वणीचा (ता. दिंडोरी) तलाठ्याला जेरबंद करण्यात आले आहे. लाचलुचपत प्रतिबंधक विभागाच्या पथकाने गुरुवारी (ता. २६) कारवाई केली असून, याप्रकरणी वणी पोलीसात गुन्हा दाखल करण्यात आला आहे. शांताराम पोपट गांगूर्डे (५१, रा. रेणुका हाईटस्‌, ध्रुवनगर, मोतीवाला मेडिकल कॉलेजसमोर, सातपुर) असे लाचखोर तलाठ्याचे नाव आहे. ( Talathi jailed for accepting bribes to correct entries on transcripts in vani )

कसबे वणी येथील तक्रारदाराच्या तक्रारीनुसार, कसबे वणी येथील त्यांच्या मालकीच्या शेतजमीन गट नं. ६१७ यावर त्यांना कर्ज काढावयाचे होते. त्यासाठी ते कसबे वणीचे तलाठी गांगूर्डे यांना भेटले. त्यावेळी फेरफार नोंदी दिंडोरी तहसील कार्यालयात मिळतील असे गांगुर्डे यांनी सांगितले. त्याप्रमाणे तक्रारदाराने तहसील कार्यालयात त्यांना पाहीजे असलेल्या नोंदी मिळाल्या.

परंतु सध्याच्या तीन नोंदी त्यांना वणीचे तलाठीकडे मिळतील असे सांगितले. त्यामुळे तक्रारदार पुन्हा गांगूर्डे यांना बुधवारी (ता. २५) भेटले असता त्यांनी, तुम्ही विकत घेतलेल्या शेतगट नंबर ६१७ चे उताऱ्यावरील शेतजमीन आकाराबाबतच्या नोंदी चुकीच्या झाल्या आहेत. त्या दुरुस्तीसाठी १० हजारांच्या लाचेची मागणी करीत, त्या दुरुस्ती करून फेरफार नोंदी देतो असे सांगितले.

याबाबत तक्रारदाराने ‘लाचलुचपत प्रतिबंधक विभागाकडे तक्रार केली. या तक्रारीची पडताळणी केल्यानंतर गुरुवारी (ता. २६) तलाठी कार्यालयात सापळा रचला होता. लाचखोर गांगुर्डे यांनी पंचासमक्ष तक्रारदाराकडून १० हजारांची लाच स्वीकारली. त्यावेळी दबा धरून असलेल्या पथकाने गांगुर्डे यांना रंगेहाथ अटक केली. याप्रकरणी वणी पोलीसात गुन्हा दाखल करण्यात आला आहे.

‘लाचलुचपत’च्या अधीक्षक शर्मिष्ठा घारगे-वालावलकर, अपर अधीक्षक माधव रेड्डी, पोलीस निरीक्षक स्वप्निल राजपूत यांच्या मार्गदर्शनाखाली पोलीस निरीक्षक नितीन पाटील, पोलीस नाईक विनोद चौधरी, अनिल गांगोडे, परशुराम जाधव यांच्या पथकाने सदरची कामगिरी बजावली.