Nashik Police : अंबड, सातपूर परिसरामध्ये दहशत माजवून भाईगिरी करणार्या दहा सराईत गुंडांवर शहर-जिल्हयातून तडीपारीची कारवाई करण्यात आली आहे. वाढत्या गुन्हेगारीच्या पार्श्वभूमीवर पोलीस आयुक्त संदीप कर्णिक यांनी आक्रमक भूमिका घेत दणका दिला आहे. (Nashik ten criminals tadipaar from city)

पोलीस आयुक्त संदीप कर्णिक यांनी आयुक्तालय हद्दीतील वाढत्या गुन्हेगारीविरोधात आक्रमक पावले उचलण्यास सुरवात केली आहे. आगामी सणउत्सव आणि विधानसभा निवडणुकीच्या काळात शहरात शांतता व कायदा-सुव्यवस्था अबाधित राखण्यासाठी शहर आयुक्तालयाकडून गुन्हेगारांविरोधात धडक कारवाईचा बडगा उगारला आहे.

त्याच अनुषंगाने परिमंडळ दोनच्या उपायुक्त मोनिका राऊत यांच्या आदेशान्वये दहा सराईत गुंडांची शहर - जिल्ह्यातून ३ महिने ते २ वर्षांसाठी तडीपारी करण्यात आलेली आहे. तडीपारी करण्यात आलेल्या गुंडांमध्ये सातपूर, अंबड आणि चुंचाळे पोलीस चौकीच्या हद्दीतील गुंडांचा समावेश आहे. (latest marathi news)

यांना केले तडीपार

सातपूर पोलीस ठाणे : गोटीराम श्रावण कोरडे (४०, रा. महालक्ष्मी चौक, सातपूर), संजय सुकट चौहाण (३४, रा. विश्वासनगर, सातपूर), संदीप सुकट चौहाण (३४, रा. विश्वासनगर, सातपूर), समीर संतोष जोशी (२८, रा. निर्वती प्रभा सोसायटी, साळुंकेनगर, सातपूर), प्रवीण उर्फ पप्पू बुधा सूर्यंवंशी (२७, रा. श्रमिकनगर, सातपूर)

अंबड पोलीस ठाणे : विजय प्रल्हाद आव्हाड (२०, रा. मयुरी गार्डन, गणेश चौक, सिडको), अमोल सुधाकर नाईक (४२, रा. नाईक फार्म, पाटीलनगर, सिडको), अभिषेक उर्फ सनी हिरामण बच्छाव (२२, रा. श्री एम्पायर बिल्डिंग, फडोळ मळा, अंबड).

चुंचाळे पोलीस चौकी : दीपक अजय धोत्रे (२२, रा. घरकुल योजना, चुंचाळे शिवार), कुणाल रवींद्र पगार (२४, रा. शांतिनिकेतन अपार्टमेंट, दत्तनगर, चुंचाळे शिवार)

सहा महिन्यात ६६ तडीपार

परिमंडळ दोनच्या क्षेत्रातून गेल्या जानेवारी ते जून या सहा महिन्यांमध्ये ६६ सराईत गुंडाविरोधात तडीपारीची कारवाई करण्यात आली आहे. तसेच, ८ रेकॉर्डवरील गुंडांवर स्थानबद्धतेची कारवाई करीत त्यांची मध्यवर्ती कारागृहात रवानगी करण्यात आली आहे. तर, तीन गुन्ह्यांतील ३२ गुन्हेगारांविरोधात मोक्काअन्वये कारवाई करण्यात आलेली आहे.