Nashik News : जिल्हा परिषदेला सन २०२२-२३ या आर्थिक वर्षात जिल्हा नियोजन समितीकडून प्राप्त झालेल्या निधी खर्चात नाशिक जिल्हा परिषद नाशिक विभागात अव्वल ठरली आहे. २०२२-२३ या आर्थिक वर्षात प्राप्त झालेल्या ५४३ कोटींच्या निधीपैकी ९४.६२ टक्के निधी खर्च झाला. यामुळे जिल्हा परिषदेने गेल्या वर्षी केलेल्या खर्चापेक्षाही अधिक खर्च केला आहे. (Nashik Zilla Parishad top in fund expenditure)

जिल्हा परिषदेला २०२२-२३ या आर्थिक वर्षात जिल्हा नियोजन समितीकडून ५१० कोटी रुपयांचा निधी देण्यात आला होता. त्यानंतर पुनर्विनियोजनातूनही जवळपास ४० कोटी रुपये निधी प्राप्त झाला होता. या निधी खर्चास दोन वर्षांची मुदत असल्याने ३१ मार्च २०२४ पर्यंत अखर्चित राहिलेला निधी जिल्हा नियोजन समितीकडे परत करावा लागणार होता.

मात्र, ग्रामविकास विभागाने १२ एप्रिलपर्यंत या निधीतील देयके ऑफलाइन पद्धतीने मंजूर करण्यास परवानगी दिली. या काळात जिल्हा परिषदेने ३६ कोटींची देयके मंजूर केली आहेत. जिल्हा परिषदेचा अखर्चित निधी ६५ कोटी रुपयांवरून २९ कोटी रुपयांपर्यंत खाली आला आहे.

तसेच, ३१ मार्चला असलेली निधी खर्चाची टक्केवारी ९४.६२ टक्यांवर पोहोचली. विभागनिहाय विचार करता ग्रामीण पाणीपुरवठा व बांधकाम विभाग क्रमांक एक वगळता इतर सर्वच विभागांनी २०२२-२३ या वर्षात प्राप्त झालेला निधी खर्च करण्यात आघाडी घेतलेली आहे. (latest marathi news)

खर्च निधी असा

ग्रामीण पाणीपुरवठा विभाग : ७९.५७ टक्के

बांधकाम विभाग क्रमांक एक : ८८.४८

कृषी विभाग : ८९

पशुसंवर्धन विभाग : ९८

उर्वरित विभाग ९१ ते ९८ टक्के

विभागात नाशिक पहिल्या स्थानावर

नाशिक विभागात नाशिक, अहमदनगर, धुळे, नंदुरबार व जळगाव या पाच जिल्हा परिषदा येतात. या पाच जिल्ह्यांतील जिल्हा परिषदेतील खर्चाची टक्केवारी पाहता यात नाशिक जिल्हा परिषद ९४.६२ टक्के निधी खर्च करीत पहिल्या स्थानी आहे. धुळे जिल्हा परिषद ९४ टक्के खर्च करून विभागात दुसऱ्या स्थानी, तर अहमदनगर व जळगाव या जिल्हा परिषदांनी अनुक्रमे ९१.११ व ९० टक्के खर्च केला. नंदुरबार जिल्हा परिषदेने २०२२-२३ या वर्षी प्राप्त झालेल्या निधीपैकी केवळ ६८ टक्के खर्च केला आहे.