National School Kho Kho Competition : नुकताच पार पडलेल्‍या ६७ व्‍या १७ वर्षाआतील शालेय राष्ट्रीय खो-खो स्‍पर्धेत नाशिकची सुषमा चौधरी देशातील सर्वोत्तम अष्टपैलू खेळाडू ठरली. तर रोहिणी भवर हिनेही चमकदार कामगिरी केली. (National School Kho Kho Competition Sushma chaudhary became best player in country nashik news)

स्पर्धेतील सुवर्णपदक विजेत्या महाराष्ट्र राज्याचे कर्णधारपद जिल्हा परिषद नाशिकच्या शासकीय माध्यमिक कन्या शाळेची खेळाडू सुषमा चौधरी हिच्याकडे होते. याच शाळेतील तिची दुसरी सहकारी खेळाडू रोहिणी भवरच्या अष्टपैलू खेळीने महाराष्ट्राने सुवर्णपदकाला गवसणी घातली.

महाराष्ट्राचे नेतृत्व भूषविणारी सुषमा चौधरी नाशिकची तसेच जिल्हा परिषदेच्या शाळेत शिक्षण घेणारी पहिली खेळाडू आहे. या स्पर्धेतील सुषमाच्या अष्टपैलू कामगिरीमुळे देशातील सर्वोत्तम खेळाडू म्हणून तिची निवड करण्यात आली आहे.

यापूर्वी १८ वर्षा आतील भुवनेश्वर येथे झालेल्या राष्ट्रीय अजिंक्यपद स्पर्धेतील सर्वोत्तम आक्रमक खेळाडू हा पुरस्कार नाशिकच्या वृषाली भोयेने पटकाविला होता. त्यानंतर देश पातळीवर पुरस्कार मिळविणारी सुषमा ही नाशिकची दुसरी खेळाडू आहे.

१७ वर्षाआतील गटात राज्याच्या संघात निवड होणाऱ्या सुषमा आणि रोहिणी या नाशिकच्या पहिल्या खेळाडू असून सुषमाची दुसरी तर रोहिणीची ही सलग दुसरी राष्ट्रीय स्पर्धा आहे. सुषमा आणि रोहिणी या नाशिक जिल्हा खोखो असोसिएशन संचलित स्व.सुरेखाताई भोसले निवासी खो-खो प्रबोधिनीच्या खेळाडू आहेत.

त्या गीतांजली सावळे आणि उमेश आटवणे यांच्या मार्गदर्शनाखाली छत्रपती शिवाजी महाराज क्रीडा संकुल येथे सराव करतात. सुषमा आणि रोहिणी यांच्या सोनेरी यशाबद्दल नाशिक जिल्हा खो खो असोसिएशनचे अध्यक्ष विश्वास ठाकूर, आजीवन अध्यक्ष रमेश भाऊ भोसले, कार्याध्यक्ष आनंद गारमपल्ली, खजिनदार सुनील गायकवाड आदींनी अभिनंदन केले.