नाशिक : सलग दुसऱ्या दिवशी दैनंदिन बाधितांच्‍या तुलनेत कोरोनामुक्‍त रुग्‍णांची संख्या अधिक राहिल्‍याने किरकोळ प्रमाणात ॲक्‍टिव्‍ह रुग्‍ण संख्या घटली आहे. बुधवारी (ता.६) जिल्ह्यात चाळीस रुग्‍णांचे कोरोनाचे अहवाल पॉझिटिव्‍ह तर ५६ रुग्‍णांनी कोरोनावर यशस्‍वीरीत्‍या मात केली. यातून ॲक्‍टिव्‍ह रुग्‍ण संख्येत सोळाने घट झाली आहे. सद्यःस्‍थितीत जिल्ह्यात ३६६ बाधितांवर उपचार सुरु आहेत. (number of active patients decreased by 16 Nshik corona update news)

बुधवारी नाशिक महापालिका क्षेत्रात ३२, नाशिक ग्रामीण भागात पाच मालेगाव महापालिका क्षेत्रात एक तर जिल्‍हा बाहेरील दोन रुग्‍णांचे कोरोनाचे अहवाल पॉझिटिव्‍ह आले. सध्या नाशिक महापालिका क्षेत्रात १९०, नाशिक ग्रामीण भागात दीडशे, मालेगावला दहा, जिल्‍हा बाहेरील सोळा बाधितांवर जिल्ह्यात उपचार सुरू आहेत. सक्रिय रुग्‍णांमधील अवघ्या तेरा रुग्‍णांमध्ये कोरोनाची लक्षणे आढळलेली आहेत. दरम्‍यान आत्तापर्यंत वाढत असलेला पॉझिटिव्‍हीटी दर काही प्रमाणात कमी झाला आहे. बुधवारी जिल्ह्याचा पॉझिटिव्‍हीटी दर २.१५ टक्‍के राहिला. प्रलंबित अहवालांची संख्या वाढती असून, सायंकाळी उशिरापर्यंत एक हजार १०७ अहवाल प्रलंबित होते. यापैकी नाशिक ग्रामीणमधील सर्वाधिक ९८९, नाशिक शहरातील ६५, मालेगावच्‍या ५३ रुग्‍णांना अहवालाची प्रतीक्षा लागून होती.