नाशिक : नाशिकमध्ये बोगस नावाने कंपनी सुरू करून, त्या माध्यमातून कंपनीमालकाने मुंबईतील बनावट कंपन्यांकडून ८५ कोटींची खोटी बिले घेऊन जीएसटी चुकवेगिरी केल्याचा प्रकार समोर आला आहे.

या प्रकरणी महाराष्ट्र वस्तू व सेवा कर विभागाच्या (जीएसटी) नाशिक कार्यालयाच्या अन्वेषण शाखेने फारूख रहीम खान यास सोमवारी (ता. १) अटक केली. (One arrested in GST evasion case 85 crore fake bills Nashik crime Latest Marathi News)

संशयित फारुख रहीम खान याने मे. युनायटेड स्टील ट्रेडर्स या नावाने बोगस कंपनी सुरू केली होती. या कंपनीच्या माध्यमातून खान याने वस्तूंची खरेदीशिवाय मुंबईतील बनावट कंपन्यांकडून ८५ कोटींची खोटी बिले घेतली अन्‌ त्या बिलांचा वापर करून १३ कोटींची वजावट प्राप्त केली.

यातून संशयित खान याने जीएसटीच्या २०१७ च्या तरतुदींचे उल्लंघन करीत शासनाची कर चुकवेगिरी केली आहे. सदरील बाब जीएसटीच्या नाशिक कार्यालयातील अन्वेषण शाखेने केलेल्या तपासात निष्पन्न झाली आहे.

या प्रकरणी अन्वेषण शाखेने संशयित खान यास सोमवारी (ता. १) अटक केली आहे. प्रथम वर्ग न्यायालयाने संशयित खान याची न्यायालयीन कोठडीत रवानगी केली आहे. सदरील कारवाई अन्वेषण शाखेचे प्रमुख राज्यकर उपायुक्त चेतन डोके यांच्या आधिपत्याखाली करण्यात आली.

यासाठी नाशिक क्षेत्राचे अपर राज्यकर आयुक्त सुभाष एंगडे, नाशिक विभागाचे राज्यकर सहआयुक्त (प्रशासन) हरिश्‍चंद्र गांगुर्डे यांचे मार्गदर्शन लाभले.

वर्षातील २९ वी कारवाई

खोटी बिले देऊन अथवा घेऊन शासनाची करोडो रुपयांची महसूल हानी करणाऱ्या करदात्यांविरुद्ध महाराष्ट्र शासनाच्या विशेष मोहिमेअंतर्गत महाराष्ट्र वस्तू व सेवा कर विभागाच्या अन्वेषण शाखांमार्फत कारवाई केली जात आहे.

अशा कारवाईतून महाराष्ट्र वस्तू व सेवा कर विभागाने कर चुकवेगिरी करणाऱ्यांना गंभीर इशारा दिला आहे. महाराष्ट्र राज्य वस्तू व सेवाकर विभागामार्फत राबविण्यात आलेल्या मोहिमेअंतर्गत ही या वर्षातील २९ वी कारवाई आहे.