Nashik Crime News : अंबड औद्योगिक वसाहतीतील कंपनीत पाणी भरण्यावरून झालेल्या वादातून झालेल्या खुनाच्या गुन्ह्यातील आरोपीला सदोष मनुष्यवधप्रकरणी जिल्हा व सत्र न्यायालयाने सहा वर्षे सश्रम कारावास व एक हजार रुपयांच्या दंडाची शिक्षा ठोठावली. ()

घनश्याम देविदास मोरे (३६, रा. रामकृष्णनगर, चुंचाळे शिवार, अंबड) असे शिक्षा झालेल्या आरोपीचे नाव आहे. तर मृताचे नाव ग्यानेंद्रकुमार रामसेवक वर्मा आहे. २५ मे २०१८ रोजी दुपारी अडीचच्या सुमारास अंबड एमआयडीसीतील कंपनीत आरोपी मोरे याने राजकिशोर यास मारले होते.

त्याचा जाब विचारण्यासाठी राजकिशोर, मृत ग्यानेंद्रकुमार हे गेले असता, आरोपीने ग्यानेंद्रकुमार यांच्या गळ्यावर चाकूने वार केले. यात त्यांचा मृत्यू झाला होता. याप्रकरणी अंबड पोलिसात खुनाचा गुन्हा दाखल होता. अंबडचे उपनिरीक्षक व्ही.जे. पवार यांनी गुन्ह्याचा तपास करीत सबळ पुराव्यांसह दोषारोपपत्र न्यायालयात सादर केले.

जिल्हा व सत्र न्यायधीश बी. व्ही. वाघ यांच्यासमोर खटला चालला. सरकारी सहायक अभियोक्ता भानुप्रिया पेठकर यांनी कामकाज पाहिले. न्यायालयाने आरोपीला सदोष मनुष्यवधप्रकरणी दोषी ठरवून सहा वर्षे सश्रम कारावासाची शिक्षा ठोठावली. पैरवी अधिकारी म्हणून सहायक उपनिरीक्षक अण्णा कुवर, तनजीम खान यांनी पाठपुरावा केला.