Phalke Smarak : चित्रपटमहर्षी दादासाहेब फाळके यांच्या स्मारकात कलारसिकांसाठी सुरू करण्यात आलेल्या लावणी महोत्सवाचे बारा वाजले आहेत. गेल्या तीन वर्षांपासून हा महोत्सव बंद पडल्यामुळे येथे फक्त स्टेजचा लोखंडी सांगडा उभा दिसतो.

त्याच्या साक्षीला असलेला लेझर शोदेखील बंद झाल्यामुळे सफेद भिंतीकडे बघूनच कलारसिक ‘गेले ते दिवस’, असे म्हणत येथून काढता पाय घेतात. (Open theater in Phalke memorial closed nashik news)

दादासाहेब फाळके स्मारकाची निसर्गाच्या सानिध्यात उभारणी करताना कला, सिनेमा, नाट्यसेवा, नृत्यकला आणि आधुनिक चित्रपटांचा प्रवास उलगडणारे मीनी थिएटर यांचा अनोखा संगम घडवला होता.

त्यामुळे फाळके स्मारकाने अल्पावधीत सर्वांगिण लोकप्रियता मिळवली. शिखरावर पोचलेल्या फाळके स्मारकाला कोरोनाकाळात येथे अवकळा लागली आणि एकामागोमाग अनेक गोष्टी बंद झाल्या. यात कलादालन बंद झाले.

त्यातील चित्रेही काढून घेण्यात आली. येथे फक्त भिंती त्यांच्या आठवणी सांगून जातात. भव्य अशा लेझर शोच्या शेजारीच लावणी महोत्सवाचा कार्यक्रम व्हायचा. येथे कलाकार आपल्या कलेचे सादरीकरण तर करायचे शिवाय, प्रेक्षक समोर आकाशाच्या छताखाली बसायचे.

त्यांची आसन व्यवस्था ही विशिष्ट पद्धतीने केलेली होती. त्यामुळे निसर्गाला कुठेही हानी पोचणार नाही, याची पुरेपुर काळजी घेऊन या लावणी महोत्सवाच्या स्टेजची रचना करण्यात आलेली होती. खुले नाट्यगृह तीन वर्षांपासून बंद झाले आहे.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

त्यामुळे स्टेज म्हणून वापरासाठी उभा केलेला लोखंडी सांगडाही पावसाच्या पाण्यात भिजून गंजण्यास सुरवात झाली आहे. त्याचा योग्य वापर व्हायला हवा. अन्यथा त्यासाठी केलेल्या खर्चावर पाणी सोडण्याची वेळ महापालिकेवर येणार आहे. चित्रही काढून नेले

फाळके स्मारक लॉकडाउन झाल्यानंतर येथील कलाकारांनी कलादालनातून आपले चित्रही काढून नेली. त्यामुळे आता रिकामे कलादालने बघायला लोकांना आवडत नाहीत. त्यामुळे प्रश्नचिन्ह उपस्थित होऊ नये म्हणून त्यांना कुलूप लावले आहे.

चित्रांअभावी विचित्र दिसणारी कलादालने सुरू होतील की नाही, याबाबत सध्यातरी ठामपणे कोणी सांगत नाही.

जोडप्यांना पुन्हा परवानगी

फाळके स्मारकात जोडप्यांना बसण्यास काही दिवसांपूर्वी परवानगी नाकारण्यात आली होती. महापालिकेचे आयुक्त बदलले की नियम बदलतात. असाच काहीसा प्रकार घडला आणि युवक, युवतींना बसण्याची परवानगी महापालिकेने दिली. त्यामुळे निसर्गरम्य वातावरणात सध्या भलतीच ‘पाखरे’ नजरेस पडतात.