नाशिक : मॉन्सून काळात (Monsoon Season) पूरस्थिती, अपघात, साथीच्या रोगांचा फैलाव अशा स्वरूपाच्या आपत्तींचा सामना करावा लागतो. अशावेळी त्या मार्गावरील अडकलेल्या प्रवाशांना आवश्यकतेनुसार सुरक्षित स्थळी हलविण्यासाठी राज्य परिवहन महामंडळामार्फत (MSRTC) अतिरिक्त बस सेवा उपलब्ध करून देण्याबाबत नियोजन करण्यात आले आहे. (Planning of additional bus services by MSRTC in flood times Nashik News)

आपत्कालीन परिस्थतीत नागरिकांना सुरक्षित स्थळी पोचविण्यासाठी राज्य परिवहन महामंडळामार्फत पर्यायी वाहतूक व्यवस्था उपलब्ध करून देण्यासाठी नियोजन करण्यात आले आहे. यासाठी सक्षम अधिकाऱ्याची नियुक्ती करून या काळात घडणाऱ्या घटना किंवा परिस्थितीबाबत वरिष्ठांना वेळोवेळी अहवालही सादर करण्यात येणार आहे. मॉन्सून काळातील यात्रा- उत्सवानिमित्ताने भाविकांसाठी वाहने उपलब्ध करून देण्याबाबत स्वतंत्र नियोजनही करण्यात आले आहे. त्याचप्रमाणे वाहतूक व्यवस्थेबरोबर क्रेन, पाण्याचे टँकर असे आवश्यक साहित्य आणि पुरेसे मनुष्यबळ उपलब्ध होण्यासाठी आराखडा तयार करण्यात आला आहे.

आपत्कालीन परिस्थितीत घटनास्थळी वेळेत मदत पोहचावी व दळणवळणाची सुविधा उपलब्ध व्हावी, यासाठी राज्य परिवहन महामंडळामार्फत अतिरिक्त बस उपलब्ध करून देण्यात येणार आहे. तसेच, या काळात नागरिकांपर्यंत तत्काळ मदत पोचविण्यासाठी महत्त्वाचे दूरध्वनी क्रमांक, फॅक्स, नियुक्त करण्यात येणाऱ्या अधिकारी व कर्मचारी यांचे संपर्क क्रमांक व ई- मेल आयडी आदी माहिती असणारा स्वतंत्र नियंत्रण कक्षही कार्यान्वित करण्यात येणार आहे.