पंतप्रधान नरेंद्र मोदी (Narendra Modi) यांनी आज 'मन की बात' (Man ki Baat) या कार्यक्रमाच्या माध्यमातून देशातील नागरिकांशी संवाद साधला. यावेळी त्यांनी स्वच्छतेसाठी काम करणाऱ्या देशभरातील वेगवेगळ्या स्वच्छता दुतांच्या कामाचं कौतुक केलं. यावेळी त्यांनी राज्यातील नाशिक जिल्ह्यातील एका तरुणांचं देखील कौतुक केलं. रोहन काळे नावाचा हा तरुण भटकंती करत करत ऐतिहासिक बारवांची स्वच्छता करत असतो. आज मन की बातच्या माध्यमातून त्याचं काम देशभरातील लोकांपर्यंत पोहोचलं.

राज्यातील वेगवेगळ्या ठिकाणी असलेल्या ऐतिहासिक बारव आज भग्नावस्थेत आहेत. अनेक बारव मध्ये कचरा साचलेला दिसतो. त्यामुळे या बारव आणि इतिहासाच्या खुना मिटण्याच्या अवस्थेत आहे. हीच गोष्ट लक्षात घेऊन रोहन काळे यांनी हे काम सुरु केलं. वेगवेगळ्या ठिकाणी बाईकवरून भटकंती करत ते स्वत: बारव स्वच्छता करून इतरांनाही स्वच्छतेचा संदेश देतात. हे काम मोठ्या स्तरावर घेऊन जाण्यासाठी त्यांनी आता महाराष्ट्र बारव मोहीम सुरु केली आहे.