नाशिक : ओमिक्रॉन व्हेरिएटंच्या (omicron varient) पार्श्वभूमीवर येत्या गुरुवार (ता. २३)पासून जिल्ह्यात लस(vaccine) न घेतलेल्या नागरिकांसाठी नियम आणखी कडक होणार आहेत. त्यांना शासकीय कार्यालये, बाजार समित्या, खासगी आस्थापना व सार्वजनिक ठिकाणी प्रवेशबंदीच्या निर्णयाची तयारी सुरू झाली आहे.

ओमिक्रॉन विषाणूचा प्रसार वेगाने होत असताना, जिल्ह्यातील नागरिक लसीकरणासंदर्भात गंभीर दिसून येत नाही. पहिला डोस घेणाऱ्यांची संख्या ४० लाख ५३ हजार असून, त्याचे प्रमाण ७८ टक्के आहे, तर २० लाख ६३ हजार नागरिकांनी लशीचा दुसरा डोस घेतला असून, त्याची टक्केवारी ४० आहे. त्यामुळे दुसरा डोस घेण्यासाठी नागरिक पुढे येत नसल्याने प्रशासनाची चिंता वाढली आहे. लशीचा एकही डोस न घेतलेल्या व्यक्तींना शासकीय कार्यालय, खासगी आस्थापना व सार्वजनिक ठिकाणी प्रवेश न देण्याविषयी प्रशासन गंभीर आहे. त्यासाठी आदेश काढण्यात आला आहे. त्यासाठी विविध आस्थापनांवर जबाबदारी निश्चित करण्यात आली असून, हलगर्जी आढळल्यास आस्थापना प्रमुखावर कारवाई होणार आहे.

गुरुवारपासून होणाऱ्या या नव्या आदेशाच्या अंमलबजावणीसाठी प्रशासनाने तयारी सुरू केली आहे. शासकीय आदेशांनुसार सोमवार (ता. २०)पासून विविध कार्यालयात अंमलबजावणी सुरू होणार आहे. ख्रिसमस आणि नववर्ष स्वागताच्या पार्ट्यांचे नियोजन सुरू आहे. त्यामुळे अशा हॉटेल व संस्थांसाठी निर्बंध कडक केले आहेत. अनियमितता आढळल्यास परवानगी देऊ नये, असे स्पष्ट निर्देश प्रशासनाला आहेत.