नाशिक : राज्यातील बदलत्या राजकीय घडामोडी, आगामी काळातील धार्मिक सण- उत्सव यासह विविध संघटनांकडून होणारी निदर्शने, आंदोलनांमुळे शहरातील कायदा व सुव्यवस्था बिघडू नये, यासाठी पोलिस आयुक्त जयंत नाईकनवरे (Police Commissioner jayant naiknavare) यांनी १३ ते २७ जुलै यादरम्यान महाराष्ट्र पोलिस कायद्यानुसार मनाई आदेश लागू केले आहेत. (Prohibition order enforced within limits of City Police Commissionerate Nashik Latest Marathi News)

राज्यातील राजकीय परिस्थिती पाहता शिवसेना समर्थक व बंडखोर आमदार समर्थकांकडून शक्तीप्रदर्शन, आंदोलनाची शक्यता, तसेच देशात काही व्यक्तींकडून जातीय तेढ निर्माण करणारे वक्तव्य केली जात असल्याने त्याचे पडसाद सर्वत्र उमटत आहे.

तसेच, आगामी सण उत्सवांच्या पार्श्वभूमीवर शहरात शांतता कायम राहावी यासाठी पोलिस आयुक्त नाईकनवरे यांनी शहरात पंधरा दिवस मनाई आदेश लागू केले आहेत. त्यानुसार नागरिकांना कोणतेही दाहक किंवा स्फोटक पदार्थ सोबत नेता येणार नाही.

दगड, शस्त्र, लाठ्या, बंदुका बाळगता येणार नाही. कोणत्याही व्यक्तीचे प्रतिकात्मक प्रेतांचे किंवा प्रतिमेचे प्रदर्शन किंवा दहन करता येणार नाही. आरडाओरड, वाद्य वाजवण्यास बंदी असेल. प्रक्षोभक भाषण, वर्तवणुकीस बंदी घालण्यात आली आहे.

पूर्वपरवानगीशिवाय पाच किंवा पाचपेक्षा जास्त नागरिकांना एकत्र जमण्यास, सभा घेण्यास किंवा मिरवणूक काढण्यास बंदी घालण्यात आली आहे. या आदेशांचे उल्लंघन करणारे महाराष्ट्र पोलिस कायदा १९५१ चे कलम १३५ नुसार शिक्षेस पात्र राहतील, असा इशारा पोलिस आयुक्त नाईकनवरे यांनी दिला आहे.