मालेगाव (जि.नाशिक) : शहरातील सिक्स सिग्मा (six sigma hospital) व सनराईज या हॉस्पिटलला परवानगी देताना कागदपत्रांची योग्यरीत्या तपासणी केली नाही. त्यातच रुग्णांकडून अवाजवी बिलांची मागणी झाल्यानंतर कृषिमंत्री दादा भुसे (dada bhuse) यांनी अधिकाऱ्यांसह या रुग्णालयाची झाडाझडती घेतल्यानंतरही कारवाईस विलंब करण्याचे प्रकरण महापालिकेच्या आरोग्याधिकारी डॉ. सपना ठाकरे यांना भोवले. आयुक्त भालचंद्र गोसावी यांनी डॉ. ठाकरे यांचा पदभार काढून घेतला असून, डॉ. हेमंत गढरी यांच्याकडे प्रभारी पदभार देण्यात आला आहे. (Six-Sigma-hospital-case-Removed-health-officer-marathi-news)

सिक्स सिग्मा प्रकरण भोवले...

सिक्स सिग्मा व सनराईज हॉस्पिटलवरील भुसे यांच्या भेटीला नऊ दिवस उलटूनही कुठलीही कारवाई न झाल्याने आरोग्याधिकाऱ्यांना निलंबित करावे, रुग्णालयांवर कारवाई करावी, या मागणीसाठी बाजार समितीचे उपसभापती सुनील देवरे यांनी शिवसेनेच्या बैठकीत उपोषणाचा इशारा दिला होता. यानंतर तातडीने हालचाली झाल्या. महापालिका अधिकारी, महात्मा फुले जनआरोग्य योजनेच्या अधिकाऱ्यांनी या रुग्णालयांची तपासणी व चौकशी केली. सायंकाळी डॉ. ठाकरे यांना पदमुक्त करण्यात आले. ठाकरे यांनीही वारंवार या पदाचा राजीनामा देण्याचा इशारा दिला होता.

आरोग्य अधिकाऱ्यांचा पदभार काढला

डॉ. गढरी यांच्याकडे तात्पुरता पदभार देण्यात आला असून, डॉ. ममता लोथे यांची आरोग्याधिकारीपदी नियुक्ती होण्याची शक्यता आहे. डॉ. लोथे रजेवर असल्याने गढरी यांच्यावर ही जबाबदारी सोपविण्यात आली. महापालिकेने सिक्स सिग्मा व सनराईज हॉस्पिटलने सादर केलेल्या लेखापरीक्षण अहवालाची चौकशी सुरू असल्याचे मुख्य लेखापरीक्षक राजू खैरनार यांनी सांगितले.