संक्षिप्त प्रगती शाळेचा अभिनव उपक्रम जळगाव : पर्यावरण संवर्धन, पुनर्वापराची सवय आणि विद्यार्थ्यांमध्ये सर्जनशीलता विकसित करण्याच्या उद्देशाने प्रगती विद्यामंदिर शाळेत ‘शिल्लक पानांची नवी कहाणी वही नवनिर्मिती कार्यशाळा’ हा अभिनव उपक्रम उत्साहात पार पडला. उपक्रमशील शिक्षक मनोज भालेराव यांनी विद्यार्थ्यांना जुन्या वह्यांतील शिल्लक कोऱ्या पानांचा वापर करून नवीन वही तयार करण्याचे प्रात्यक्षिक दाखविले. या कार्यशाळेतून विद्यार्थ्यांना संसाधनांचा योग्य वापर, बचतीची जाणीव आणि पर्यावरणपूरक जीवनशैलीचा संदेश देण्यात आला. मुख्याध्यापिका संगीता गोहील यांनी विद्यार्थ्यांनी अशा उपक्रमांतून पर्यावरणाबाबत जागरूकता निर्माण करून समाजासमोर आदर्श निर्माण करावा, असे सांगितले. विद्यावर्धिनी शिक्षण संस्थेचे चेअरमन प्रेमचंदजी ओसवाल, अध्यक्षा मंगला दुनाखे, सचिव सचिन दुनाखे यांनी उपक्रमाचे कौतुक केले.