नाशिक : मध्य रेल्वेच्या पंचवटी एक्स्प्रेसने रोज प्रवास करणाऱ्या चाकरमान्यांची सध्या मोठीच गैरसोय सुरू आहे. कोरोना पूर्वी मासिक पास धारकांसाठी चार आरक्षित डबे कमी झाल्याने एकाच डब्यात पासधारकांची गैरसोय होत असल्याच्या तक्रारी आहेत. दीड वर्षापासून कोरोना आगमनानंतर वाहतूक वेळापत्रक कोलमडले आहेत. विशेषतः रोज मुंबईला अप-डाउन करणाऱ्या चाकरमान्यांची गैरसोय वाढली आहे.

कोविड पूर्वी नाशिकहून मुंबईला ये- जा करणाऱ्या मासिक पासधारकांसाठी ५ डबे आरक्षित होते. त्यापैकी एक डबा पासधारकांसाठी आरक्षित होता व ४ डबे सामान्य प्रवाशांसाठी होते. परंतु, आता नाशिकसाठी एकही डबा आरक्षित नाही. पूर्वीप्रमाणे नाशिकला उघडणारा मासिक पास डबा व इतर ४ सामन्य डबे नाशिकसाठी उपलब्ध करून देण्याची मागणी आहे. पंचवटी मासिक पासधारकांचे डबे घटल्याने एकाच डब्यात प्रचंड गर्दी होते. त्यात कोरोना प्रतिबंधात्मक नियम पाळण्याचे आवाहन केले जाते. त्यासाठी रेल्वेगाड्या घटविल्या आहेत, तर दुसरीकडे मात्र प्रचंड गर्दीत नाशिकच्या प्रवाशांना मुंबईला जावे लागते.

प्रवाशांना दुहेरी मार

पंचवटीत प्रवाशांसाठी एका बाजूला डबे कमी केले असताना गोदावरी रेल्वेही बंद आहे. त्यामुळे पंचवटी आणि गोदावरी अशा दोन गाड्याने ये- जा करणाऱ्या प्रवाशांचा सगळा ताण एकट्या पंचवटी एक्स्प्रेसवर पडला आहे. त्यात पंचवटीचे डबे कमी केले पण गोदावरी एक्स्प्रेसही बंद असल्याने दुहेरी मार प्रवाशांना सोसावा लागतो आहे. कोरोना कमी झाल्याने दैनंदिन जीवन पूर्वपदावर येत असताना सध्या प्रवाशांची संख्या मोठ्या प्रमाणात वाढत असतानाच गोदावरी एक्स्प्रेस बंद असल्याने पंचवटी एक्स्प्रेसवर संपूर्ण ताण वाढला आहे. जे सध्या सहा डबे अनारक्षित केले आहे ते मनमाड येथूनच प्रवाशांनी भरलेले असतात. त्यामुळे नाशिक येथून प्रवास करणाऱ्या प्रवाशांना व पासधारकांना बसण्यास जागा मिळत नाही. यासाठी मासिक पासधारक व प्रवासी वेल्फेअर असोसिएशनमार्फत रेल्वे प्रशासनास मागणी करण्यात येणार आहे.

''पंचवटीचे डबे कमी केले पण गोदावरी एक्स्प्रेसही बंद असल्याने दुहेरी मार प्रवाशांना सोसावा लागतो आहे. कोरोना कमी झाल्याने दैनंदिन जीवन पूर्वपदावर येत असताना सध्या प्रवाशांची संख्या मोठ्या प्रमाणात वाढत असतानाच गोदावरी एक्स्प्रेस बंद असल्याने पंचवटी एक्स्प्रेसवर संपूर्ण ताण वाढला आहे.''

- किरण बोरसे, रेल्वे वेल्फेअर असोसिएशन