नाशिक : शिवसेना नेते खासदार संजय राऊत यांच्या उपस्थितीत दोन दिवस विविध विकासकामांचे उद्‌घाटन व शिवसैनिकांचा संवाद मेळावा आयोजित करण्यात आला आहे, अशी माहिती जिल्हाप्रमुख विजय करंजकर व महानगरप्रमुख सुधाकर बडगुजर यांनी दिली.

कार्यक्रमाची माहिती देण्यासाठी शिवसेना भवनमध्ये बैठक बोलाविण्यात आली होती. या वेळी ते बोलत होते. शहरात संघटनात्मक पातळीवर शिवसेनेची भक्कम फळी उभी राहिली असून, महापालिका निवडणुकीसाठी शिवसैनिक सज्ज झाले आहेत. निवडणुकीच्या पार्श्‍वभूमीवर खासदार राऊत यांच्या दोन दिवसांच्या दौऱ्याला विशेष महत्त्व प्राप्त झाले आहे. शिवसैनिकांनी कार्यक्रमांना उपस्थित राहण्याचे आवाहन महानगरप्रमुख बडगुजर यांनी केले. विरोधी पक्षनेता अजय बोरस्ते, माजी जिल्हाप्रमुख दत्ता गायकवाड, माजी आमदार वसंत गिते, गटनेते विलास शिंदे यांनीही या वेळी मनोगत व्यक्त केले.

खासदार राऊत यांचे कार्यक्रम पुढीलप्रमाणे : सकाळी १० वाजता प्रभाग २१ मध्ये बिटको हॉस्पिटलचे हिंदूहृदयसम्राट बाळासाहेब ठाकरे रुग्णालय व विभागीय कार्यालयाचा नामकरण सोहळा, अंतर्गत रस्ते डांबरीकरण व जलकुंभ भूमिपूजन, सकाळी ११ वाजता प्रभाग दोनमध्ये अमृतधाम येथे शिवसेना संपर्क कार्यालयाचे उद्‌घाटन, सकाळी साडेअकरा वाजता प्रभाग २६ मध्ये विविध विकासकामांचे भूमिपूजन, दुपारी १२ वाजता प्रभाग २४ मध्ये पर्यावरण निधीतून नंदिनी नदीवर संरक्षक जाळी बसविणे, दुपारी साडेबारा वाजता प्रभाग २६ मध्ये रामकृष्णनगर येथील सभामंडप व मंदिर परिसराचे सुशोभीकरण व उद्यानाचे लोकार्पण, प्रभाग २७ मध्ये हिंदूहृदयसम्राट बाळासाहेब ठाकरे हॉस्पिटलचा लोकार्पण सोहळा, सायंकाळी कर्मवीर दादासाहेब गायकवाड सभागृहात पदाधिकाऱ्यांशी संवाद साधतील. या वेळी माजी महापौर विनायक पाडे, माजी आमदार योगेश घोलप, उपजिल्हाप्रमुख जगन आगळे, युवासेना जिल्हाधिकारी राहुल ताजनपुरे, देवानंद बिरारी, सचिन मराठे, महेश बडवे, सभापती प्रशांत दिवे, सुवर्णा मटाले, सूर्यकांत लवटे, मामा ठाकरे, संजय चव्हाण आदी उपस्थित होते.