नाशिक : १५ व्या वित्त आयोगातून २०२१-२२ या आर्थिक वर्षामध्ये जिल्हा परिषदेला प्राप्त झालेल्या निधीचे नियोजन करण्यासाठी प्रशासनाकडून रेटा लावला जात आहे. याच पार्श्‍वभूमीवर जिल्हा परिषद अध्यक्षांनी सदस्यांना कामे सुचविण्यासाठी लवकरात लवकर प्रस्ताव सादर करण्याचे आवाहन केले असून, त्यासाठी २५ जानेवारीपर्यंत डेडलाइन दिली आहे.

जिल्हा परिषदेला २०२१-२२ या आर्थिक वर्षात बंधित व अबंधित असा अनुक्रमे साडेसात कोटी व साडेचार कोटी म्हणजेच एकत्रित १२ कोटी रुपये निधी प्राप्त झाला आहे. सदस्यांचा कार्यकाळ आता केवळ दोन महिने उरला असल्याने या निधीचे नियोजन होऊन सदस्यांनी सुचवलेली कामे मार्गी लागावीत म्हणून प्रशासनाकडून रेटा सुरू आहे. कारण, प्रस्ताव आल्यानंतर त्यापुढील सर्व कागदपत्र, नियोजन, आराखडा, निविदाप्रक्रिया करण्यासाठी लागणारा अवधी लक्षात घेता प्रशासन आता प्रस्तावासाठी आग्रही आहे. निधीचे कामांसाठी समान वाटप झाल्यास प्रत्येक सदस्याला साधारणपणे १६ लाख रुपये मिळणार आहेत.

सदस्यांची होणार धावपळ

१५ व्या वित्त आयोगाच्या प्राप्त निधीसाठी सदस्यांनी २५ जानेवारीअखेर कामांचे प्रस्ताव सादर करण्याचा निर्णय अध्यक्ष बाळासाहेब क्षीरसागर यांनी पदाधिकारी, सदस्यांसोबत बैठकीनंतर घेतला असल्याचे समोर आले आहे. त्यामुळे प्रस्ताव सादर करण्यास सदस्यांना अवघे दोनच दिवस मिळणार आहेत. त्यामुळे जिल्हा परिषद सदस्यांची धावपळ होणार आहे.