खामखेडा (नाशिक) - प्राथमिक शिक्षणाच्या सार्वत्रिकीकरणासाठी व गुणवत्तापूर्ण शिक्षणासाठी शासन स्तरावरुन अनेकविध नाविन्यपूर्ण योजना राबविल्या जात आहेत. आजघडीला गावोगावीच्या जिल्हा परिषद शाळांमध्ये अधिकारी व शिक्षकांनी खांद्याला खांदा लावून 'अधिकारी-शिक्षक-समाज-शाळा-विद्यार्थी'यांनी शैक्षणिक सेतू तयार केलाय. यात महिला शिक्षिकांचे योगदानही  खुप मोलाचे आहे. अशाच राज्याच्या कानाकोपऱ्यात  शिक्षणाची छोटी छोटी बेटं निर्माण करणाऱ्या महिला उपक्रमशील अधिकारी व शिक्षिकांच्या प्रयत्नांच्या यशोगाथांची माहिती करुन देणारे संतोष मुसळे लिखीत व अनुश्री प्रकाशन पुणे प्रकाशित 'सावित्रीच्या लेकी'या पुस्तकाचे प्रकाशन अॅक्टिव टिचर्स सामाजिक प्रतिष्ठाण संचलित 'कृतिशील शिक्षक महाराष्ट्र' म्हणजेच अॅक्टिव टिचर्स महाराष्ट्र (ए.टी.एम) समूहाच्यावतीने दि.१० फेब्रुवारी रविवार रोजी पहिल्या राज्यस्तरीय शिक्षक साहित्य संमेलनात झाले.

पुस्तकाच्या प्रकाशनाप्रंसगी संमेलनाचे अध्यक्ष बाल  साहित्यीक प्रा.डॉ.विशाल तायडे, सागताध्यक्ष ज्योती बेलवले, एन सी ई आर टी दिल्ली कला व शिक्षण विभाग प्रमुख डॉ. पवन सुधीर, ज्येष्ठ साहित्यिक बाबा भांड, शिक्षणाधिकारी प्राथमिक औरंगाबाद सुरजकुमार जैस्वाल, कृतिशिल शिक्षक महाराष्ट्रचे राज्य संयोजक विक्रम अडसूळ, संजय खाडे, ज्ञानदेव नवसरे, भरत काळे, संजय खाडे यांची उपस्थिती होती.

या पुस्तकात ११ उपक्रमशिल अधिकारी व ४५ उपक्रमशिल शिक्षिकांच्या उपक्रमांचा समावेश आहे.