Nandurbar News : रात्रीच्या वेळी अंधारात बऱ्याचदा उसाची वाहतूक करणारी वाहने इतर वाहनचालकांच्या नजरेत न आल्याने, अनेकदा परिसरात लहान-मोठे अपघात झाले आहेत.

ही बाब लक्षात घेऊन सहयोग सोशल ग्रुप व तळोदा पोलिस ठाण्याने शहराजवळील श्रीकृष्ण व दसवड खांडसरी येथे जाऊन या ठिकाणी असलेल्या वाहनांना विविध रंगांचे रेडियम स्टिकर लावले. (Radium stickers on vehicles to prevent accidents nandurbar news)

तसेच रस्त्यावर येणाऱ्या-जाणाऱ्या असंख्य वाहनांनादेखील हे स्टिकर लावले. या उपक्रमाचे सर्वत्र कौतुक होत आहे. आता सर्वत्र ऊस तोडणीला सुरवात झाली असून, शेतकरी बांधव तसेच ट्रॅक्टरद्वारे अथवा इतर वाहनांद्वारे ऊस शेतातून कारखान्यापावेतो पोचविला जात आहे. उसाची वाहतूक करणाऱ्या वाहनांना कारखान्यापावेतो पोचत असताना बऱ्याच वेळेस रात्र होते.

बऱ्याचदा रात्रीच्या अंधारात उसाने भरलेले ट्रॅक्टर इतर वाहनांना दिसत नाही, त्यामुळे इतर वाहने अचानक ट्रॅक्टरवर धडकतात व मोठा अपघात होतो. त्या अपघातात बऱ्याच वाहनधारकांना कधी-कधी आपला जीवदेखील गमवावा लागला आहे.

ही बाब लक्षात घेऊन नेहमी समाजहितासाठी विविध उपक्रम राबवत असलेला येथील सहयोग सोशल ग्रुप व तळोदा पोलिस ठाणे यांनी पुढाकार घेऊन अंधारात लांबून चमकेल अशा लाल, पिवळ्या, हिरव्या रंगाचे रेडियम स्टिकर उसाची वाहतूक करणाऱ्या वाहनांना लावले आहेत. त्यासाठी तळोदा परिसरात असलेल्या दसवड खांडसरी व श्रीकृष्ण साखर कारखाना येथे जाऊन वाहनांना हे विविध रेडियमचे स्टिकर लावण्यात आले.

रस्त्यावर येणाऱ्या-जाणाऱ्या ट्रॅक्टरला व इतर वाहनांनादेखील रेडियमचे स्टिकर लावण्यात आले. या वेळी बऱ्याच वाहनचालकांनी स्वतःहून स्टिकर मागून घेतले व आपल्या वाहनाला लावून घेतले. यामुळे होणारा अपघात टळून जीवितहानी होणार नाही, अशी अपेक्षा सहयोग सोशल ग्रुप व तळोदा पोलिस ठाण्यातर्फे व्यक्त करण्यात आली आहे. या उपक्रमाविषयी वाहनचालकांनी समाधान व्यक्त केले, तसेच नागरिकांकडून उपक्रमाचे कौतुक करण्यात येत आहे.

पोलिस निरीक्षक राहुलकुमार पवार, महाराष्ट्र ग्राहक पंचायतीचे जिल्हाध्यक्ष आर. ओ. मगरे, सचिव अशोक सूर्यवंशी, सहयोग सोशल ग्रुपचे अध्यक्ष ॲड. अल्पेश जैन, राजाराम राणे, अतुल सूर्यवंशी, रमेशकुमार भाट, चेतन शर्मा, कुशल जैन, विनोद माळी, मोईन पिंजारी, प्रमोद जहागीर तसेच तळोदा वाहतूक शाखेचे पोलिस नाईक शशिकांत अहिरे, विजय जावरे, संदीप महाले, रवींद्र पाडवी आदी उपस्थित होते.

''अंधारात लांबून चकाकेल अशा विविध रंगांच्या रेडियमचे स्टिकर ऊस वाहतूक करणाऱ्या वाहनांना लावलेले असले तर इतर वाहनांना उसाचे वाहन सहज नजरेत भरते. त्यामुळेच उसाची वाहतूक करणाऱ्या परिसरातील असंख्य वाहनांना सहयोग ग्रुपच्या माध्यमातून पिवळे, लाल, हिरव्या रंगाचे रेडियमचे स्टिकर लावले. त्यामुळे निश्चितच अपघातांना आळा बसेल.''-अॅड. अल्पेश जैन,अध्यक्ष, सहयोग सोशल ग्रुप