तळोदा : उमेदवारी अर्ज भरण्याच्या मुदतीला एकच दिवस शिल्लक असताना येथील कृषी उत्पन्न बाजार समितीसाठी शुक्रवारी (ता. ३१) पर्यंत केवळ १४ उमेदवारी अर्ज दाखल करण्यात आले आहेत. तालुक्यात अनेक फॉर्मुल्यांवर चर्चा होताना दिसून येत आहेत. (Taloda Market Committee Election Only 14 nominations were filed till 31 march nandurbar news)

मात्र माजी आमदार उदेसिंग पाडवी व विद्यमान आमदार राजेश पाडवी या दोन्ही मातब्बर नेत्यांच्या भूमिकेवर बाजार समिती बिनविरोध होणार अथवा नाही यावर सगळे अवलंबून असून फॉर्मुल्यांवरील चर्चा थांबता थांबेना असेच चित्र असल्याचे दिसत आहे.

येथील कृषी उत्पन्न बाजार समितीच्या संचालक मंडळाच्या निवडणुकीसाठी तालुक्याचे राजकीय वातावरण गरम झाले आहे. संचालक मंडळाच्या १८ जागांसाठी तब्बल ११४ उमेदवारी अर्ज विक्री झाले आहेत. त्यामुळे सोमवारी (ता.३) उमेदवारी अर्ज जमा करण्याच्या शेवटच्या दिवशी सर्वच राजकीय पक्षाचे नेते व पदाधिकाऱ्यांची उमेदवारी अर्ज दाखल करण्यासाठी धावपळ होणार आहे.

सोमवारी उमेदवारी अर्ज दाखल होण्याची शंभरी पार होते काय याकडे लक्ष राहणार आहे. एकीकडे बाजार समिती बिनविरोध करण्यासाठी प्रयत्न सुरू असताना दुसरीकडे प्रत्येक राजकीय पक्षाला आपल्या ताकदीनुसार व भविष्यातील सोयीनुसार संचालक मंडळात हिस्सा पाहिजे असल्याचे बोलले जात आहे.

हेही वाचा : जीएसटीसाठी नोंदणी केलीच नाही तर??

भूमिका नसल्याने पक्षांतर्गत गटागटात विखुरलेला भाजप बाजार समिती निवडणुकीसाठी मात्र एकसंध दिसत आहे. तर दुसरीकडे काँग्रेस, शिवसेना शिंदे गट व ठाकरे गटातील कार्यकर्त्यांनी वेट ॲन्ड वॉचची भूमिका घेतली असल्याचे दिसून येत आहे. मात्र मागील २० वर्षांपासून कृषी उत्पन्न बाजार समितीचा कार्यभार पाहणारे राष्ट्रवादीचे प्रदेश उपाध्यक्ष व माजी आमदार उदेसिंग पाडवी यांची भूमिका महत्त्वाची मानली जात आहे.

त्यात कोणत्या पक्षाला किती जागा याचा फॉर्म्युल्यावर केवळ चर्चा रंगल्या आहेत. मात्र जाहीरपणे कोणीही भूमिका मांडताना दिसत नसल्याने संभ्रम वाढला आहे. उमेदवारी अर्ज भरण्याच्या सोमवारी शेवटचा दिवस आहे. त्यानंतर ५ एप्रिलला छाननी होऊन ६ ते २० एप्रिलपर्यंत माघार घेता येणार आहे. त्यानंतरच निवडणूक होणार की बाजार समिती बिनविरोध होणार याचे चित्र स्पष्ट होणार आहे.