धुळे - आखाती, आफ्रिकन देशांतील उद्योगांसाठी महाराष्ट्राच्या पर्यटन आणि उद्योग क्षेत्रात मोठ्या संधी आहेत. या उद्योग संधींचा उद्योजकांनी लाभ घ्यावा, यासाठी विशेष प्रयत्न करण्यात येतील, असे आश्‍वासन पर्यटनमंत्री जयकुमार रावल यांनी दुबईत शनिवारी केल्याचे त्यांनी "सकाळ'ला सांगितले. 

गल्फ महाराष्ट्र बिझनेस फोरमतर्फे दुबईत चौथ्या आंतरराष्ट्रीय बिझनेस कॉन्फरन्स महाबिझ 2018 चे उद्‌घाटन मंत्री रावल आणि उद्योगमंत्री सुभाष देसाई यांनी केले, त्या वेळी मंत्री रावल बोलत होते. आखाती आणि आफ्रिकन देशांतील सुमारे पाचशे उद्योजक, महाराष्ट्रातील उद्योजक या परिषदेला उपस्थित होते. 

आफ्रिकन देश, आखाती देश आणि महाराष्ट्र राज्य यांच्यात एकमेकांत पर्यटन, आरोग्य, शिक्षण, सेवा, माध्यम, माहिती तंत्रज्ञान, रिअल इस्टेट, व्यापार आदी 10 उद्योग क्षेत्रात कशा रोजगार, उद्योग संधी आहेत, भांडवल वृद्धी आणि कर्ज उभारणीची प्रक्रिया काय आहेत, यावर या परिषदेत चर्चा, परिसंवाद झाले. 

हज यात्रेकरू कोट्यात वाढ  
मंत्री जयकुमार रावल यांच्या प्रयत्नामुळे सौदी अरब सरकारने भारतातील हज यात्रेकरूंचा कोटा पाच हजाराने वाढवला आहे. गेल्या आठवड्यात मुंबईत झालेल्या हज उमराह इंटरनॅशनल फोरमच्या ट्रॅव्हल मार्ट कार्यक्रमात 40 आंतरराष्ट्रीय हज टूर ऑपरेटर सहभागी झाले होते. त्या वेळी मंत्री रावल यांनी हज यात्रेकरू कोटा वाढवून देण्याची मागणी केली होती. सौदी अरब सरकारने ही मागणी मान्य केली. दोन वर्षांत दुसऱ्यांदा भारताला हजयात्रेकरूंचा कोटा वाढवून देण्यात आला.