भंडारा : सौंदड पुनर्वसन येथे गो-तस्करांनी गावकऱ्यांना केलेल्या मारहाणप्रकरणी कर्तव्यात कसूर केल्याचा ठपका ठेवून जिल्हा पोलिस अधीक्षक विनिता साहू यांनी 11 पोलिस कर्मचाऱ्यांना निलंबित केले. सर्व निलंबित कर्मचारी अड्याळ पोलिस ठाण्यातील असून ठाण्याचे प्रभारी अधिकारी यशवंत किचक यांचाही त्यात समावेश आहे.
7 जुलैला सौंदड पुनर्वसन येथे जनावरे भरत असलेल्या ट्रकला बाजूला करण्यावरून वाद झाला. त्यानंतर 25 ते 30 संख्येत असलेल्या गो-तस्करांनी घराघरांत घुसून गावकऱ्यांना बेदम मारहाण केली. यात पुरुषोत्तम दामा केवट, भारत मेश्राम, सोमा निबांर्ते, चंद्रभान भुते हे गंभीर जखमी झाले. गावकऱ्यांनी पोलिसांना या घटनेची माहिती दिली; पण, त्यांनी ते गांभीर्याने घेतले नाही. तसेच आरोपींच्या अटकेच्या मागणीसाठी ठाण्यात गोळा झालेल्या जमावावरही पोलिसांनी लाठीचार्ज केला.
जिल्हा पोलिस अधीक्षकांनी या घटनेची प्राथमिक चौकशी केली. त्यात पोलिसांनी कर्तव्यात कसूर व दिरंगाई केल्याचे प्रथमदर्शनी निदर्शनास आले. त्यामुळे ठाण्याचे प्रभारी अधिकारी सहाय्यक पोलिस निरीक्षक यशवंत किचक, पोलिस नायक दर्शना टेंभूर्णे, पोलिस हवालदार अनिल नंदेश्‍वर, भगतसिंह बैस, ग्यानीराम बोरकर, दादाजी कठाणे, हरीश कांबळे, जितेंद्र भोगे, अरविंद सतदेवे, पोलिस शिपाई लिंगदेव निंबार्ते, मंगला शेडके, सहाय्यक फौजदार शरद गिऱ्हेपुंजे यांना निलंबित केले. निलंबित किचक यांना भंडारा मुख्यालयात; तर, इतर पोलिस कर्मचाऱ्यांना अड्याळ पोलिस ठाण्यात हजर राहण्याचे आदेश आहे. या कारवाईमुळे पोलिस प्रशासनात एकच खळबळ उडाली आहे.