यवतमाळ : जिल्ह्यातील 251 ग्रामपंचायतींमध्ये रिक्त असलेल्या 401 पदांसाठी पोटनिवडणुकीचा कार्यक्रम जाहीर झालेला होता. त्यापैकी 92 जागा बिनविरोध झाल्यात. दोन ठिकाणी सार्वत्रिक, तर 11 ठिकाणी आज रविवारी (ता.23) मतदान झाले. दुपारी साडेतीनपर्यंत दोन सार्वत्रिक निवडणुकीसाठी 43 टक्के मतदान झाले होते. राज्य निवडणूक आयोगाने ग्रामपंचायत निवडणुकीचा कार्यक्रम घोषित केला होता. जुलै 2019 ते सप्टेंबर 2021मध्ये मुदत संपणाऱ्या व नव्याने स्थापित झालेल्या ग्रामपंचायतींसाठी सार्वत्रिक निवडणूक जाहीर करण्यात आली होती. रिक्त असलेल्या सरपंच व उपसरपंच तसेच सदस्यपदाच्या पोटनिवडणुकीचा कार्यक्रमही निवडणूक आयोगाने जाहीर केला होता. जिल्ह्यातील खडकसावंगा, मालापूर, बारड या तीन ग्रामपंचायतींच्या सार्वत्रिक निवडणुकीचा कार्यक्रम जाहीर करण्यात आला होता. शिवाय 251 ग्रामपंचायतींमध्ये पोटनिवडणूक घेतली जाणार होती. पोटनिवडणुकीच्या 401 जागांपैकी 92 जागा बिनविरोध झाल्या असून, रविवारी (ता.23) एकूण 11 जागांसाठी मतदान झाले. बाभूळगाव तालुक्‍यातील मालापूर व खडगसावंगा या दोन सार्वत्रिक निवडणुकीसाठी दुपारी साडेतीनपर्यंत 43 टक्के मतदान झाले.