अमरावती : बुधवारी २० ऑक्टोबर रोजी तिवसा तालुक्यातील शिदवाडी येथील 17 वर्षीय सेजल गोपाल जाधव या मुलीने गरिबीला कंटाळून आपल्या राहत्या घरी आत्महत्या केली होती, तेव्हा या कुटुंबाची सातवन भेट घेऊन पालकमंत्री यशोमती ठाकूर यांनी सेजल च्या बहिण,भावाच्या शिक्षणाची जबाबदारी घेत कुटुंबाला आर्थिक मदत करत धीर दिला.

गेल्या दोन वर्षांपासून असलेल्या कोरोना महामारीमुळे अनेक रोजगार बुडाले आहेत. जगणं कठीण झाले आहे. त्यातच वाढत्या महागाईने इंधनाच्या वाढलेल्या दरामुळे जगणं अधिक असह्य झाल आहे. हे खरं असलं तरी तरुणांनी आणि विद्यार्थ्यांनी हार मानू नये,असं आवाहन अमरावती जिल्ह्याच्या पालकमंत्री ऍड. यशोमती ठाकूर यांनी यावेळी केले.अमरावतीतील शिदवाडी येथे आत्महत्याग्रस्त मुलीच्या कुटुंबीयांची भेट घेताना त्यांनी आपल्या भावना व्यक्त केल्या. छिदवाडी येथील सेजल जाधव या 17 वर्षीय मुलीने आपल्या आई-वडिलांवर असलेल्या कर्जामुळे आणि शिक्षणासाठी त्यांच्याकडे पुरेसे पैसे नसल्याने निराशेतून आत्महत्या केली होती,गेल्या तीन वर्षांपासून सतत असलेली नापिकी, कर्जबाजारीपणा आणि शाळेत जाण्यासाठी गणवेश सुद्धा नसल्याचं या मुलीने आपल्या आत्महत्येपूर्वी लिहिलेल्या चिठ्ठीत नमूद केले आहे.

तिने राहत्या घरी पंख्याला गळफास घेऊन आत्महत्या केली. ही घटना अत्यंत दुर्दैवी असल्याचे सांगत पालक मंत्री ठाकूर यांनी सदर कुटुंबीयांची भेट घेतली. कुटुंबियांचे सांत्वन करून त्यांना काही आर्थिक मदतही केली. दोन्ही मुलींच्या शिक्षणाची आणि एका मुलीच्या लग्नाची जबाबदारी सुद्धा त्यांनी यावेळी स्वीकारल्याचे जाहीर केले.

आत्महत्याग्रस्त कुटुंबीयांना शासनाच्यावतीने मदत मिळण्यासाठी तहसीलदार यांना सूचना दिल्या, सध्याचे वातावरण अतिशय नैराश्य पूर्ण आहे महागाईचा आगडोंब उसळतो आहे. मात्र तरीही हार न मानता तरुणांनी आत्महत्येसारखे टोकाचे पाऊल उचलू नये असं आवाहन त्यांनी केले, यावेळी तहसीलदार वैभव फरतारे, संदीप आमले, रविंद्र हांडे, रितेश पांडव, आशिष खाकसे, सरपंच रुचिता चव्हाण, मंगेश राठोड, अंकुश वेरूळकर, भारत ढोणे, गौतम ढोणे, रुपेश महल्ले आदी उपस्थित होते.