राळेगाव (जि. यवतमाळ) : वनविभाची फिरती चमू अवणीच्या दोन्ही बछड्यांच्या मागावर असून शनिवारी (ता. 10) रात्री पाच कॅमेरे ट्रॅप करण्यासाठी लावण्यात आले आहेत. अवणीला ठार केल्यानंतर तिचे दोन्ही बछडे अनाथ झाले आहेत. ते पुढील महिन्यात एका वर्षाचे होणार असून अद्याप शिकारीत तरबेज झाले नाहीत.

ते लहान- सहान शिकार करू शकतात. परंतु माणसांची शिकार करण्यास सक्षम नाहीत. मात्र, अवणीच्या मृत्युपूर्वी आठ दिवस आधी व त्यानंतर आठ दिवस असे त्यांना 16 दिवसांपासून खायला मिळण्याबाबत संशय व्यक्त केला जात आहे. ते ज्या चिखली जंगल परिसरात आहेत, त्याठिकाणी मांसाचे तुकडे टाकले जात आहे. चिखली परिसरात शनिवारी रात्री सात दरम्यान दोन्ही बछडे आढळले. दरम्यान, वनविभाग 5 कॅमेरे ट्रॅप लावून त्यांचा शोध घेत आहे.