पुसद (जि. यवतमाळ) : लग्नसोहळ्यात वधू-वरांना शुभेच्छांसह भेटवस्तू देण्याची प्रथा आहे. मात्र, पुसद येथील शेखर वानखेडे व रोशनी टाले या नवदांपत्याने आपल्या लग्नसोहळ्यात स्पर्धा परीक्षेची पुस्तके वसंत-सुधा स्टडी सर्कलच्या संचालकांना भेट दिली. या अनोख्या भेटीने वऱ्हाडी मंडळींना सुखद धक्का दिला.
पुसद येथील गोविंदनगरातील शेखर मारुती वानखेडे हे यवतमाळ येथील जिल्हा न्यायालयातील लिपिक पदावर कार्यरत आहेत. त्यांनी पुसद येथील फुलसिंग नाईक महाविद्यालयातील वसंत-सुधा स्टडी सर्कलच्या अभ्यासिकेत स्पर्धा परीक्षेचा अभ्यास केला व त्यांची निवड झाली. अभ्यासिकेचे महत्त्व लक्षात आल्याने शेखर यांनी अभ्यासिकेला स्पर्धा परीक्षांची पुस्तके भेट द्यावी, असे मनोमन ठरविले व त्यांनी भेटीचा मुहूर्त विवाह सोहळ्यात निश्चित केला.
योगायोगाने शेखर यांचा विवाह पुसद येथील ऍक्सिस बॅंकेच्या सहायक मॅनेजर रोशनी अनंत टाले यांच्याशी जुळला. हा लग्न सोहळा येथील मंगल कार्यालयात गुरुवारी (ता.12) पार पडला. मंगलाअक्षता उधळल्यानंतर वर शेखर व वधू रोशनी यांनी पाच हजार 200 रुपये किमतीची स्पर्धा परीक्षा पुस्तके वसंत-सुधा स्टडी सर्कलचे संयोजक प्रा. विजय राठोड यांच्याकडे सुपूर्द केली. या भेटीबद्दल अभ्यासिकेचे विद्यार्थी प्रतिनिधींनी नवदाम्पत्याचे आभार मानले.
सुरुवातीच्या काळात वसंत-सुधा स्टडी सर्कल शहरात एकमेव अभ्यासिका होती. येथे विशेषत: पोलिस भरती, सैन्यभरतीचा अभ्यास करणारे पुसद शहरासह तालुक्यातील विद्यार्थी येत असतात. येथील अनेक विद्यार्थी राज्यातील अनेक जिल्ह्यांत पोलिस भरती व सैन्य भरतीत निवड झालेले आहेत. विद्यार्थ्यांना या पुस्तकांचा निश्चितपणे लाभ होईल, अशी अपेक्षा व्यक्त होत आहे.
पुष्पगुच्छ ऐवजी पुस्तके भेट द्या!
लग्न अथवा वाढदिवसात पुष्पगुच्छऐवजी स्पर्धा परीक्षेची उपयुक्त पुस्तके भेट द्यावीत. मुख्य तीन गरजांसोबत पुस्तके ही चौथी मूलभूत गरज आहे. पुस्तकांमुळे जीवनात दिशा मिळते. यापुढेही इतर अभ्यासिकांना टप्प्याटप्प्यात पुस्तके भेट देण्याची इच्छा आहे. अभ्यासिकेस पुस्तक भेट देण्याची प्रेरणा माझे काका प्रा. अशोक वानखेडे, प्रा. लक्ष्मण वानखेडे, मामा प्रा. रमेश वाघमारे यांच्याकडून मिळाली.
- शेखर वानखेडे, पुसद.
(संपादन : दुलिराम रहांगडाले)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.