उमरखेड (यवतमाळ) : नात्याने मामेबहीण लागत असलेल्या पाच वर्षीय चिमुकलीवर आतेभावानेच अत्याचार केला. ही खळबळजनक घटना रविवारी (ता. 13) सायंकाळी तालुक्यातील चुरमुरा पार्डी येथे घडली. 

पाचवर्षीय मुलगी ही आजीसोबत चुरमुरा पार्डी येथे वास्तव्यास आहे. रविवारी सायंकाळी सातच्या दरम्यान आत्याकडे डाळभात देण्यासाठी आजीने मुलीला पाठविले. मुलीला जाऊन बराच वेळ झाला तरी ती परत आली नाही. मुलगी घरी न आल्याने आजीची काळजी वाढली.

दरम्यान, शेजारच्या व्यक्तीने तुझी नात रक्ताने माखली आहे, असे सांगितले. मुलीला रडण्याबाबत विचारणा केली असता, जवळच्या टेकडीवर घडलेली घटना सांगितली. त्यामुळे आजीच्या जिवाचा तिळपापड झाला. पीडित मुलीच्या आजीने उमरखेड पोलिस ठाणे गाठून तक्रार दिली. त्यावरून संशयित तरुणाविरुद्घ गुन्हा नोंदविण्यात आला. घटनेची वाच्यता होताच संशयित पसार झाला असून, पोलिस त्याचा शोध घेत आहेत. या घटनेमुळे तालुक्यात एकच खळबळ उडाली आहे.