जेवनाळा (जि. भंडारा) : जिल्ह्यातील पालांदूर (palandur bhandara) येथे ग्रामीण रुग्णालयात प्रसूतीदरम्यान बाळाचा मृत्यू झाल्याची घटना घडली. डॉक्टरांच्या हलगर्जीपणामुळे ही घटना घडल्याचा आरोप मृताच्या कुटुंबीयांनी केला आहे.

गरोदर माता दुर्गा रवी उरकुडे यांना प्रसूतीसाठी २१ तारखेला ग्रामीण रुग्णालय पालांदूर येथे भरती करण्यात आले. परंतु, येथील डॉक्टरांनी तिला भरती करून घेतले नाही. दुसऱ्या दिवशी रविवारी पहाटे चार वाजता भरती करण्यात आले. १२ वाजताच्या दरम्यान बाळाचा जन्म झाला. परंतु, बाळ मृत असल्याचे समजले. मात्र, बाळाच्या आईच्या सांगण्यानुसार प्रसूती झाली तेव्हा बाळ जिवंत होते. त्याला साफ करताना डॉक्टरांच्या हातातून बाळ जवळ ठेवलेल्या ट्रे मध्ये पडले. त्यामुळे बाळाचा मृत्यू झाला. ग्रामीण रुग्णालयात योग्यता धारक डॉक्टरांची नेमणूक केलेली असते. या प्रकरणाची चौकशी करून दोषी डॉक्टरवर कारवाई करावी अशी मागणी उरकुडे कुटुंबीयांनी केली आहे.

दरम्यान, डॉक्टरांशी संपर्क करण्याचा प्रयत्न केला असता, होऊ शकला नाही.