आरमोरी (जि. गडचिरोली) : कॉंग्रेसचे आरमोरी विधानसभा क्षेत्राचे उमेदवार आनंदराव गेडाम यांना अपक्ष उमेदवार बग्गूजी ताडाम यांचे अपहरण प्रकरण भोवणार आहे. या प्रकरणी फरार असलेले गेडाम यांचा जामीन मंगळवारी (ता. 15) जिल्हा न्यायालयाने नामंजूर केला.
गेडाम व त्यांच्या मुलासह 13 जणांवर अपहरणाचा गुन्हा आरमोरी पोलिस ठाण्यात दाखल करण्यात आला होता. त्यानंतर गेडाम यांच्यासह सर्वजण फरार झाले आहेत. आरमोरी विधानसभा क्षेत्रातील अपक्ष उमेदवार बग्गूजी ताडाम आपल्या तीन साथीदारांसह बुधवारी (ता. 9) रात्री सुकाळा येथून नाटकाच्या उद्‌घाटनानंतर घरी परत येत होते. दरम्यान, गेडाम यांचा मुलगा लॉरेन्स व त्याच्या साथीदारांनी पाठलाग करून वैरागड-मानापूर फाट्यावर ताडाम यांची गाडी अडवून त्यांचे अपहरण केले. त्यानंतर ताडाम व त्यांच्या साथीदारांना रात्री सलंगटोला येथे थांबवण्यात आले. त्याठिकाणी आनंदराव गेडाम उपस्थित होते. त्यांनी ताडाम यांना शिवीगाळ व मारहाण केली. तसेच प्रचारातून माघार घेण्याची धमकी दिली. यावेळी ताडाम यांनी गोंडी भाषेत कुटुंबीयांना मोबाईलवर आपले अपहरण झाल्याची माहिती दिली. यानंतर त्यांची सुटका झाली. ताडाम व सहकाऱ्यांनी गुरुवारी रात्री आरमोरी पोलिस ठाण्यात तक्रार दाखल केली. पोलिसांनी गेडाम व त्यांचा मुलगा लॉरेन्स गेडाम यांच्यासह पंकज तुलावी, जीवन नाट आणि इतर अशा एकूण 11 जणांवर अपहरणाचा गुन्हा दाखल केला. मात्र मतदानाचा दिवस जवळ येत असल्याने फरार असलेले गेडाम यांच्या अडचणी वाढल्या आहेत.