तिवसा (जि. अमरावती) : शहरात आतापर्यंत चार जणांचा डेंगीमुळे मृत्यू झाल्याच्या घटना घडल्या असून, आरोग्याचा प्रश्न चांगलाच ऐरणीवर आला आहे. गुरुवारी तिवसा नगरपंचायत येथील कर्मचाऱ्याच्या १३ वर्षांच्या मुलाचा अमरावती येथील खासगी रुग्णालयात उपचारादरम्यान मृत्यू झाला. त्यामुळे डेंगीने तीन मुलांच्या मृत्यूसह हा आकडा पाचवर गेला आहे. कृष्णा सचिन गौरखेडे (वय १३) असे मृत मुलाचे नाव आहे.

शहरासह तालुक्यात डेंगी, सर्दी, खोकला, ताप अशा विविध आजारांची लागण होत असल्याने रुग्णांची संख्या वाढत आहे. अस्वच्छता, नागरिकांमध्ये जागरुकतेचा अभाव, वेळेवर उपचार न मिळणे, आजारपणाचे निदान न होणे व पैशाअभावी मृत्यूचा दर वाढत असल्याची चर्चा शहरात दिसून येत आहे. गेल्या आठवड्याभरात एकूणच चार जणांचा डेंगी या आजारामुळे मृत्यू झाल्याच्या घटना समोर आल्या आहेत.

नगरपंचायत येथील कर्मचारी सचिन गौरखेडे यांच्या मुलाचा डेंगीमुळे मृत्यू झाल्याची घटना घडली. याआधी दोन रुग्णांचा यातच मृत्यू झाला असून शहरात आतापर्यंत पाच जणांचा मृत्यू झाल्याची नोंद आहे. त्यामुळे शहरासह तालुक्यातील आरोग्याचा प्रश्न चांगलाच ऐरणीवर आल्याचे दिसून येत आहे.

नगरपंचायत प्रशासन वाढदिवस साजरे करण्यात मग्न

काही दिवसांआधी पालकमंत्री यशोमती ठाकूर यांनी नगरपंचायतच्या कारभाराविषयी नाराजी व्यक्त करीत अधिकारी व कर्मचाऱ्यांची कानउघाडणी केली होती. मात्र, शहरात अस्वच्छतेमुळे विविध आजारांची लक्षणे यातून लहान मुलांचे मृत्यू होत असताना नगरपंचायत येथील अधिकारी व कर्मचारी वाढदिवस साजरे करण्यात मग्न असल्याची चर्चा शहरात आहे.