अमरावती : मेळघाटच्या माथ्यावरील कुपोषणाचा शिक्का पुसण्यासाठी राज्य शासनाने कंबर कसली असून कुपोषणमुक्तीसाठी मास्टर प्लॅन तयार करण्यात आला आहे. येत्या १५ दिवसांत त्याचे सकारात्मक परिणाम दिसू लागतील, असे प्रतिपादन आरोग्यमंत्री डॉ. तानाजी सावंत यांनी आज (ता.३) येथे केले. दोन दिवसीय मेळघाट दौरा आटोपल्यानंतर त्यांनी शनिवारी प्रशासनातील वरिष्ठ अधिकाऱ्यांची बैठक घेतली. त्यानंतर प्रसार माध्यमांशी संवाद साधला. आरोग्यमंत्री म्हणाले, मेळघाट कुपोषणमुक्त करण्यासाठी एक मॉडेल तयार करण्यात आले असून सहा महिने ते एका वर्षाच्या काळात मेळघाटातील कुपोषणावर नियंत्रण झालेले दिसेल.

मेळघाटातील प्राथमिक आरोग्य केंद्र, ग्रामीण रुग्णालयांमधील परिस्थिती आपण पाहिली असून मेळघाटात पुरेसा औषधीसाठी उपलब्ध असल्याचे ते म्हणाले.

इर्विनच्या प्रश्नांवर चुप्पी

जिल्हा सामान्य रुग्णालयात पुरेसा औषधसाठा उपलब्ध नसून सीटी स्कॅन, एक्सरे मशिन्स दोषपूर्ण असल्याच्या प्रश्नांवर आरोग्यमंत्र्यांनी उत्तर देण्याचे टाळले. आपण यावेळी केवळ मेळघाटचे व्हीजन ठेवल्याचे त्यांनी सांगितले.