सिरोंचा (जि. गडचिरोली) : शेतातील कामे आटोपून घराकडे परत येत असताना अंगावर वीज पडल्याने शेतकऱ्याचा मृत्यू झाला. ही घटना आज दुपारी तीन वाजताच्या सुमारास सिरोंचा तालुक्‍यातील बालममत्यम गावाच्या शिवारात घडली. निलय्या मलय्या लंगारी (वय 45) असे मृत शेतकऱ्याचे नाव आहे.
निलय्या आज सकाळी शेतात धान पिकावर कीटकनाशक फवारणी करण्यासाठी गेले होते. दुपारी काम आटोपून घराकडे परत येत असताना अचानक मेघगर्जनेसह रिमझिम पाऊस सुरू झाला. पाऊस हलका असल्याने ते चालत राहिले. त्याचवेळी अचानक त्यांच्या अंगावर वीज कोसळली. यात त्यांचा घटनास्थळीच मृत्यू झाला.