सिंदेवाही (जि. चंद्रपूर) ः शेतातील काम आटोपून घराकडे येत असलेल्या शेतकऱ्यावर वाघाने हल्ला करून ठार केले. ही घटना शुक्रवारी (ता. 14) सायंकाळच्या सुमारास गुंजेवाही येथे घडली. मृताचे नाव अशोक जंगलू चौधरी (वय 57) आहे. जंगलाला लागूनच गुंजेवाही गाव आहे. गावालगत अशोक चौधरी यांचे शेत आहे. सध्या खरिपाचा हंगाम आहे. त्यामुळे शेतीच्या कामासाठी अशोक चौधरी शुक्रवारी शेतावर गेले होते. काम आटोपल्यानंतर घराकडे येण्यास निघाले असता रस्त्यात वाघाने हल्ला करून त्यांना ठार केले. बराच वेळ होऊनही ते घरी न परतल्याने घरच्यांनी शोधाशोध सुरू केली. चिकमारा मार्गावर त्यांचा मृतदेह आढळून आला. यापूर्वी याच तालुक्‍यात वाघाने तिघांना ठार केले होते.