मोर्शी (जि. अमरावती) : तालुक्‍यातील येरला शेतशिवारात संतोष जीवनलाल आरोडे (वय 35) या तरुण शेतकऱ्याने अमरावती-नरखेडरेल्वे लाइनवर शनिवारी (ता. 12) सकाळी आत्महत्या केली. सततच्या नापिकीने त्रस्त झाल्याने त्याने आत्महत्या केल्याची चर्चा आहे.
आरोडे याने गेल्या काही दिवसांपूर्वीदेखील विष पिऊन आत्महत्या करण्याचा प्रयत्न केला असल्याचे समजते. परंतु त्यात तो अयशस्वी झाला. त्याला जिल्हा सामान्य रुग्णालय अमरावती येथे दाखल करण्यात आले होते. 11 ऑक्‍टोबरला दुपारी त्याला दवाखान्यातून सुटी मिळाली. घरी आल्यानंतर रात्रीच्या सुमारास तो घरून निघून गेला. येरला शिवारातील एका शेतातील विहिरीमध्ये आत्महत्या करण्याचा प्रयत्न केला. पण त्यातही तो अयशस्वी झाल्याने येरला शिवाराला लागून असलेल्या नरखेड-अमरावती लोहमार्गावरील पहाटे साडेतीन ते चारच्या दरम्यान येणाऱ्या मालगाडीखाली त्याने स्वतःला झोकून देत आत्महत्या केली. सततच्या नापिकीने झालेल्या कर्जबाजारीपणाला कंटाळून संतोषने आत्महत्या केल्याची परिसरात चर्चा आहे. मृताच्या मागे वयोवृद्ध आई, बहीण, पत्नी व दोन लहान मुले असा बराच मोठा आप्तपरिवार आहे. सर्व परिवाराच्या पालनपोषणाची जबाबदारी संतोषच्या खांद्यावर होती.