वर्धा : आर्वीतील नांदपूर येथे वृद्धाला जिवंत जाळल्याचा प्रकार सोमवारी (ता. २८) घडले. यात पोलिसांनी तिघांना अटक केली. त्यांनी केवळ पन्नास रुपयांच्या दुधातून वृद्धाला जिवंत जाळल्याचे पोलिसांच्या तपासात पुढे आले आहे. अभिमान पखाले (वय ६७) रा. नांदपूर असे मृताचे नाव आहे. तर प्रमोद सूर्यभान दाहट, सुभाष मारोती पखाले, मारोती कोरकु पखाले अशी अटक करण्यात आलेल्या आरोपींची नावे असल्याचे पोलिसांकडून सांगण्यात आले आहे. (Vidarbha Crime News)

अभिमान पखाले याच्याशी रविवारी (ता.२७) दूध विकत आणण्याच्या कारणावरून मारोती पखाले याचा वाद झाला होता. सोमवारी मारोती पखाले यांच्या घरी दारू आणि मटणाची पार्टी होती. आश्रयाला असलेल्या अभिमान पखाले यालाही त्या पार्टीत सहभागी करण्यात आले. सर्वांनी मद्यप्राशन केल्याने दुधासाठी दिलेल्या ५० रुपयांच्या कारणावरून प्रमोद दाहट, मारोती पखाले, धर्मा पखाले यांनी अभिमान पखाले यांच्याशी वाद घातला. हा वाद विकोपाला गेल्याने अभिमान पखाले याला मारहाण करण्यात आली. यात तो अर्धमेला झाला. अशा अवस्थेत असताना त्याच्यावर रॉकेल टाकून त्याला जाळण्यात आले.

या प्रकरणी संशयीत प्रमोद दाहट, मारोती पखाले, धर्मा पखाले यांना पोलिसांनी सोमवारी (ता. २८) ताब्यात घेतले. रात्री उशीरापर्यंत गुन्हा नोंद केल्या नंतर मंगळवारी (ता. एक) न्यायालयात हजर केले असता त्यांना तीन दिवसाची पोलिस कोठडी ठोठावण्यात आली. या प्रकरणी त्या घरातून चौकशीत रॉकेलच्या तेलाची डबकी, जळालेले कापडाचे तुकडे हस्तगत करण्यात आले आहे. या प्रकरणाचा तपास उपविभागीय पोलिस अधिकारी सुनील साळूंखे यांच्या मार्गदर्शनात ठाणेदार भानुदास पिदूरकर करीत आहेत.

दूध आणण्याच्या कारणावरून झालेला वाद विकोपाला गेल्याने त्याला प्रथम मारहाण केली. तो अर्धमेल्या अवस्थेत असताना त्याला जाळून मारण्यात आले असल्याचे प्राथमिक तपासात पुढे आले आहे. तपासासाठी न्यायालयाने तीन दिवसांची पोलिस कोठडी दिली आहे. नेमके काय ते तपासात समोर येईल.

- भानूदास पिदूरकर, ठाणेदार, आर्वी