यवतमाळ : येथील जिल्हा परिषद कार्यालयाच्या आवारात जुगार (Gambling) खेळत असल्याची गुप्त माहिती अवधूतवाडी पोलिसांना मिळाली. त्यानुसार पोलिसांनी टाकलेल्या छाप्यात (Police raid) जिल्हा परिषदेच्या काही कर्मचाऱ्यांसह आठ जणांना ताब्यात घेतले. त्यांच्याकडून पाच लाखांचा मुद्देमाल जप्त केला आहे. ही कारवाई शुक्रवारी मध्यरात्री करण्यात आली.

प्रकाश कुद्रुपवार (५३, रा. प्रभातनगर, यवतमाळ), देवानंद जामनकर (४८, रा. शास्त्रीनगर), गणेश गोसावी (५५, रा. शिवम कॉलनी), प्रकाश व्यास (५८, रा. जिल्हा परिषद क्वार्टर), गुणवंत ढाकणे (४७, रा. जामनकरनगर), अनिल शिरभाते (४५, रा. जामनकरनगर), संदीप श्रीरामे (४५, रा. वैभवनगर), चरण राठोड (५३, रा. विदर्भ हाउसिंग सोसायटी, यवतमाळ) अशी अटक केलेल्या आरोपींची नावे आहेत.

त्यांच्याकडून ३१ हजार ११० रुपये रोख, नऊ मोबाईल, पाच दुचाकी व दोन चारचाकी असा एकूण पाच लाख चार हजार ६१० रुपयांचा मुद्देमाल जप्त करण्यात आला आहे. कारवाईदरम्यान एरावत चव्हाण (५५) हा घटनास्थळावरून फरार झाला. घटनास्थळावर त्याचा मोबाईल मिळाला असून पोलिस त्याचा शोध घेत आहेत.

जिल्हा परिषदेच्या कार्यालयात जिल्हा परिषद कार्यालयातील निवृत्त वाहनचालक टाईमपास म्हणून पत्ते खेळत (Gambling) बसायचे. मग तेथे त्यांना काही नवीन सोबती मिळालेत. कार्यालय संपल्यानंतर काही कर्मचारीदेखील जुगार खेळू लागलेत. रात्री उशिरापर्यंत तेथे जुगार चालत होता. त्यात काही मद्यप्रेमीही असल्याने त्यांच्या मद्यप्राशनाचा कार्यक्रमदेखील तेथेच चालत होता.

अनेक महिन्यांपासून हा प्रकार बिनबोभाटपणे सुरूच होता. त्यामुळे तेथे नियमित बसणारेही बिनधास्त होते. मात्र, शुक्रवारी अवधूतवाडी पोलिसांना या प्रकाराची माहिती मिळाली आणि त्यांनी या गुजारावर (Gambling) छापा (Police raid) टाकला. या छाप्यात ताब्यात घेण्यात आलेल्यांमध्ये जिल्हा परिषदेच्या कर्मचाऱ्यांचा समावेश आहे.