अमरावती : शहरात माथेफिरूकडून युवती व महिलांची छेडखानी करण्याच्या घटनांना ब्रेक बसलेला नाही. एकतर्फी प्रेमात पडलेले माथेफिरू युवतीचे मन वळविण्यासाठी वेगवेगळे प्रयोग करीत आहे. एकाला तुझ्यासाठी काहीही करेल... असे म्हणणे महाग पडले.

प्रफुल्ल शिंदे (वय 20, रा. मायानगर, अमरावती) असे त्या माथेफिरूचे नाव आहे. राजापेठ ठाण्यात पीडित युवतीच्या (वय 18) तक्रारीवरून प्रफुल्लविरुद्ध विनयभंगाचा गुन्हा दाखल होताच, त्याला अटक झाली. मागील काही दिवसांपासून परिसरातील एका युवतीवर प्रफुल्लची नजर खिळली होती. तिचे मन वळविण्यासाठी त्याने आठवड्यापासून तिचा पाठलाग सुरू केला.

वाचा - पतीसोबत अश्‍लील वर्तन करण्यास बाध्य केले; नंतर व्हिडिओ व्हायरल करण्याची दिली धमकी 

युवतीने त्याच्याकडे सुरुवातीला दुर्लक्ष केले. परंतु पाठलाग करणे, जवळीक साधण्याचा प्रयत्न करण्याचा प्रकार वाढत गेला. युवती स्वत:हून दाद देत नसल्याचे बघून प्रफुल्लने तिला रस्त्यात अडवून, तू मला आवडते, तुझ्यासाठी काहीही करू शकतो. या शब्दात आपल्या भावना व्यक्त केल्या. पीडितेला माथेफिरूचे असे वागणे पटले नाही. तिने राजापेठ ठाण्यात तक्रार केली. पोलिसांनी प्रफुल्लविरुद्ध गुन्हा नोंदवून त्याला अटक केली.

महिलेची छेडखानी
नागपुरीगेट परिसरातील एका महिलेस घराच्या परिसरातच धक्का देऊन छेडखानी केली. महिलेच्या तक्रारीवरून नागपुरीगेट पोलिसांनी संशयित खालिद खान नईम खान (वय 25) विरुद्ध गुन्हा दाखल केला.

चिडीमार विरोधी पथक गेले कुठे
माथेफिरूवर नजर ठेवण्यासाठी आयुक्तालयात दुचाकीस्वार दामिनींसह दोन स्वतंत्र महिला अधिकाऱ्याचा समावेश असलेले चिडीमार विरोधी पथक स्थापन झाले होते. सद्य:स्थितीत या पथकाचे अस्तित्वच दिसत नाही.