अमरावती ः संत गाडगेबाबा अमरावती विद्यापीठाद्वारे उन्हाळी 2019 सत्रपद्धती व वार्षिक पद्धती अभ्यासक्रमाच्या नियमित महाविद्यालयीन विद्यार्थ्यांचे तसेच माजी व बहि:शाल विद्यार्थ्यांचे परीक्षा आवेदनपत्र महाविद्यालयाने विद्यापीठात सादर करण्याच्या तारखेत वाढ करण्यात आली आहे. संबंधित वर्गवारीतील विद्यार्थ्यांची परीक्षा आवेदनपत्रे महाविद्यालयाने आवश्‍यक शुल्क व विहित विलंब शुल्क प्रतिदिन 50 रुपये याप्रमाणे 8 मार्च 2019 पर्यंत स्वीकारून 11 मार्च 2019 पर्यंत विद्यापीठात सादर करावयाची आहेत.
विद्यापीठ प्रशासनाने विद्यार्थ्यांचे शैक्षणिक नुकसान होऊ नये म्हणून उन्हाळी 2019 सत्रपद्धती व वार्षिक पद्धती अभ्यासक्रमाच्या नियमित महाविद्यालयीन विद्यार्थ्यांचे तसेच माजी व बहि:शाल विद्यार्थ्यांचे आवेदनपत्र विद्यापीठात सादर करावयाच्या तारखेत वाढ केली आहे. परीक्षा आवेदनपत्र विद्यापीठाच्या परीक्षा व मूल्यमापन मंडळ कार्यालयाच्या दर्शनी भागावरील संबंधित परीक्षेच्या खिडकीवर 11 मार्च 2019 रोजी स्वीकारण्याची व्यवस्था करण्यात आली आहे. विनिर्दिष्ट अभ्यासक्रमांच्या परीक्षांच्या विद्यार्थ्यांकरिता ही अंतिम संधी असून व्यक्तिगत व इतर कारणांमुळे ज्या विद्यार्थ्यांची परीक्षा आवेदनपत्रे विद्यापीठात सादर करावयाचे राहून गेले, अशा सर्व विद्यार्थ्यांना विद्यापीठाने वाढवून दिलेली तारीख महाविद्यालयांनी अवगत करून देण्याचा प्रयत्न करावा, याबाबत विद्यापीठाशी संलग्नित सर्व महाविद्यालयांचे प्राचार्य व पदव्युत्तर शैक्षणिक विभागांचे विभागप्रमुख यांना पत्र पाठवून परीक्षा व मूल्यमापन मंडळाचे संचालक डॉ. हेमंत देशमुख यांनी कळविले आहे.